Álemdik jáne dástúrli dinder kóshbasshylarynyń sezine 500-den astam volonter tartylady

NUR-SULTAN. QazAqparat – Qyrkúıekte elordada ótetin Álemdik jáne dástúrli dinder kóshbasshylarynyń VII sezin uıymdastyrý men ótkizýge 500-den astam volonter kómektesedi, dep habarlaıdy QazAqparat tilshisi.

«Sezd jumysyna álemniń 51 elinen 100-den astam delegatsııa qatysady dep kútilýde. Bul erekshe jáne tarıhı oqıǵa bolmaq. Osyndaı aýqymdy is-sharany ótkizý úshin biz ony uıymdastyrýǵa kómektesetin 500-den astam eriktini tartamyz», - dedi Parlament Senatynyń tóraǵasy Máýlen Áshimbaev elordada ótip jatqan Ortalyq Azııa volonterler forýmy barysynda.

Sondaı-aq, Senat tóraǵasy álemdik jáne dástúrli dinder kóshbasshylarynyń VII sezi 13-15 qyrkúıek kúnderi Nur-sultan qalasynda ótetinin eske saldy.

Onyń aıtýynsha, aıtýly sharada kútiletin qurmetti qonaqtardyń qatarynda Rım Papasy Frantsısk, ál-Azhardyń joǵarǵy ımamy Sheıh Ahmed at-Taıeb jáne basqa tulǵalar bar.

Odan bólek, Máýlen Áshimbaev Senat elimizde volonterliktiń damýy men salaǵa qatysty máselelerdi erekshe baqylaýda ustaıtynyn tilge tıek etti.

«Qazaqstan Ortalyq Azııadaǵy parlamentaralyq áriptestermen volonterlik qozǵalysty yntymaqtastyqqa damytyp, jan-jaqty qoldaý kórsetýge daıyn», - deıdi ol.

Aıta ketsek, qazir elordada Ortalyq Azııa elderi volonterleriniń forýmy ótip jatyr .

Atalǵan sharaǵa Qazaqstan, Qyrǵyzstan, Ózbekstan, Túrikmenstan, Tájikstan jáne Ázirbaıjan, Belarýs jáne Reseıden 600-ge jýyq volonter qatysýda.