Álemdik qýyrshaq teatrlary «Quralaı» festıvalinde bas qosady

ASTANA. QazAqparat - 1 shilde kúni elordada Qazaqstannyń qýyrshaq ónerindegi birinshi kásipqoı rejısser, Qazaqstan Respýblıkasynyń eńbek sińirgen artısi, Astana qalasynyń Memlekettik Qýyrshaq teatrynyń kórkemdik jetekshisi Quralaı Eshmuratova atyndaǵy ІІ «Quralaı» qýyrshaq teatrynyń Halyqaralyq festıvali ashylady, dep habarlaıdy QazAqparat.  

1-4 shildede elordalyq Qýyrshaq teatrynyń sahnasynda Týnıs, Bosnııa jáne Gertsegovına, Belgııa, Italııa, Polsha, Reseı, Túrkııa, Estonııa, Serbııa, Qazaqstan memleketteriniń ujymdary óner kórsetedi.

Festıval Respýblıka dańǵylynyń boıymen «Jastar» saraıynan teatrǵa deıingi qatysýshylar sherýimen bastalady.  Qalanyń keń kóshelerimen ulttyq kıim kıgen balalar men artısterdiń súıemeldeýimen úrmeli aspaptar orkestri, boıshań qýyrshaqtar, «Zara» shoý-baletiniń artısteri, aǵashaıaqpen júrýshiler shoýy júrip ótedi. Sherý saǵat 10:30-da bastalady.    

Festıval baǵdarlamasynyń birinshi spektakli saǵat 13.30-da kórsetiledi. Memlekettik Almaty qýyrshaq teatry kórermender nazaryna «Qańbaq shal» halyq ertegisin qoıady. Eki saǵattan keıin «ADADJO» sahnalyq mınıatıýrasy kópshilik nazaryna usynylady. Bul - Reseı memlekettik sahnalyq óner ınstıtýty qýyrshaq teatry fakýltetiniń jáne «Kýltýrna stsena MALI STVARI TREBINE» (Bosnııa jáne Gertsegovına) teatrynyń birlesken shyǵarmashylyq jobasy. Qonaqtardyń biri qoıylymdy tamashalasa, basqalary serb rejısseri Amela Výchenovıchtiń  «Qýyrshaq jáne bala», «Adamgershilikke tárbıeleý», «Qýyrshaq oınatýshy artıstiń óneri» sheberlik dáristerine qatysa alady. Festıvaldiń birinshi kúni ıtıalııalyq «Verdı» qýyrshaq teatrynyń ınteraktıvti shoýymen aıaqtalady.

2 shildede saǵat 10.00-de kórermender stambýldyq (Túrkııa) «Qarakóz» qýyrshaq teatrynyń oryndaýyndaǵy «Qoqys qubyjyǵy» qoıylymyn kóre alady. Sodan keıin sankt-peterborlyq Vıktor Antonov «Jiptegi tsırk» kórsetedi. Sonymen qatar, kúndizgi baǵdarlamaǵa estonııalyq «Projekt» teatrynyń «Ýmka» qoıylymy jáne «MarekWaszkiel» polıak teatrynyń «POBÝDKA, PODЪEM I SIıANIE» týyndysy engizildi.

3 shildede festıval Týnıs ulttyq qýyrshaq óneri ortalyǵynyń «Vstrecha» qoıylymymen jalǵasady. Belgııalyq «FigurenTheatreVlinders» teatry «Kishkentaı qara balapan týraly hıkaıany» kórsetedi. Tambov memlekettik qýyrshaq teatry «Jýcha» qoıylymyn usynady. festıval elordalyq Qýyrshaq teatrynyń «Máńgilik bala beıne» spektaklimen aıaqtalady. Otandyq dramatýrg Roza Muqanovanyń eńbegi 1949-1989 jyldary Semeı polıgonynda ıadrolyq synaqtardan zardap shekken balalarǵa arnalǵan.

4 shilde kúni keshke Astana qýyrshaq teatrynyń zalynda «Quralaı» halyqaralyq festıvaline qatysýshylardy marapattaý jáne onyń saltanatty jabylýy ótedi.