Álemdik kompanııalardyń sertıfıkatyn alǵan ІT mamandarǵa jeńildik jasalady

ASTANA. QazAqparat – Álemdik kompanııalardyń sáıkes emtıhanyn tapsyryp, sertıfıkatyn alǵan qazaqstandyqtarǵa jumysqa ornalasýda jeńildik jasalady. Muny BAQ ókilderiniń qatysýymen ótken brıfıngte Ǵylym jáne joǵary bilim komıtetiniń tóraǵasy Darhan Ahmed-Zákı aıtty, dep habarlaıdy QazAqparat tilshisi.

«Aqparattyq-tehnologııa salasyn alatyn bolsaq, olar «NR», «HUAWEI» sııaqty kompanııalardyń sáıkes emtıhanyn tapsyryp, sertıfıkat alatyn bolsa, sonda oǵan jumysqa turý jeńildeý bolady. Óıtkeni, qazirgi úlken kompanııalardyń suranysy – teorııalyq bilimmen qatar, kásibı bilim bolýy kerek. Sondaı kásibılikti qysqa merzimdi kýrstar arqyly qamtamasyz etedi», - dep toqtaldy Darhan Ahmed-Zákı.

Komıtet tóraǵasy bul bastama bakalavr, magıstratýra men doktarantýra baǵyty boıynsha oqyǵandardyń dıplomy men kásibıligin joqqa shyǵarmaıtynyn atap ótti.

«Oqý oryndary negizgi bilimdi beredi. Soǵan sáıkes, kásibı bilimdi ushtastyrý basty másele bolyp tabylady. Munyń barlyǵy «ómir boıy bilim alý» júıesine sáıkes. Atap aıtqanda, bul formaldy emes bilim berý tujyrymdasyn oryndaýdyń bir tetigi. Bul jańa úrdis bolǵandyqtan túsinbeýshilikter bolýy múmkin. Bul dıplomdy joqqa shyǵarmaıdy. Bul qosymsha sertıfıkatsııalaý baǵdarlamasy», - dep málim etti ol.

Brıfıngide komıtet tóraǵasy shetelge ketip jatqan ІT salasynyń mamandaryna qatysty saýalǵa jaýap bergen edi. Onyń málimdeýinshe, ózge memleketke ketken qazaqstandyqtar qaıta oralyp jatyr.