Álemdik dinder sezi: «Erikti elshi» ataǵyn berý usynyldy

NUR-SULTAN. QazAqparat – Álemdik jáne dástúrli dinder lıderleri sezi hatshylyǵynyń múshelerine «Erikti elshi» ataǵyn berý kerek. Mundaı usynys atalǵan sezdiń XVIII hatshylyǵy otyrysynda jasaldy, dep habarlaıdy QazAqparat tilshisi.

«Sezd hatshylyǵy múshelerine Álemdik jáne dástúrli dinder lıderleri seziniń «Erikti elshisi» ataǵyn berý týraly másele jan-jaqty talqyǵa tústi. Erikti elshiler sezd atynan jáne tapsyrmasymen túrli álemdik dıalog alańdarynda sezdiń ıdeıalary men tujyrymdamalaryn nasıhattaý sóz sóıleý quqyǵyna ıe bolar edi», - dedi QR Aqparat jáne qoǵamdyq damý vıtse-mınıstri Marat Ázilhanov.

Sonymen qatar, ol jumys tobynyń músheleri aldaǵy sezdiń sektsııalyq otyrystarynyń formatyn ózgertip, mazmunyn baıytý máselesine qatysty da usynystar bergenin aıtty.

«Jumys tobynyń qatysýshylary sektsııalyq otyrystardy uıymdastyrýdyń jańa formattaryn ázirleý týraly sheshim qabyldady. Jumys tobynyń barlyq músheleri Konfessııaaralyq jáne órkenıetaralyq dıalogty damytý jónindegi Nazarbaev ortalyǵymen óz elderimen, seriktes elderdegi bedeldi halyqaralyq uıymdarmen, iri dinı ortalyqtarmen yntymaqtastyqty nyǵaıtýǵa daıyn ekendikterin bildirdi» - dedi vıtse-mınıstr.

Aıta keteıik, búgingi otyrysta Álemdik jáne dástúrli dinder lıderleriniń VI Sez qorytyndylary men Hatshylyq qyzmetiniń keleshegi boıynsha pikir almasylýda. Sodan keıin 2021 jylǵy Álemdik jáne dástúrli dinder lıderleriniń VII Sezin ótkizý boıynsha usynystar talqylanyp jatyr.