Álemdik deńgeıdegi ozyq kompanııalar qurýǵa Qazaqstanda barlyq jaǵdaı bar - Elbasy
«Elimizdiń baılyǵy «Samuryq-Qazyna» Qoryna shoǵyrlanǵan, al bul - halyqtyń búgingi hám keleshek ál-aýqaty. Biz transformatsııany qalaı oryndasaq, elimiz de solaı damıtyn bolady. Shekspırdiń «bolý, álde bordaı tozý» («byt ılı ne byt»-avt.) degen suraǵy da dál bizdiń aldymyzdan shyǵady», - dedi N. Nazarbaev.
Prezıdent bul rette osyndaı jumysty qolǵa alǵan memleketterdiń tek 30 paıyzy ǵana jetistikke jetkenin, qalǵan 70 paıyzynyń joly bolmaǵanyn atap ótti. «Bizge osy joly bolmaǵan jetpis paıyzdyń ishinde qalmaýdy oılastyrýymyz qajet», - degendi basa aıtty Memleket basshysy. Elbasynyń sózine qaraǵanda, transformatsııa baǵdarlamasy álemniń «Samuryq-Qazynaǵa» uqsas qorlarynyń tájirıbesine súıene otyryp jasalǵan.
Máselen, sıngapýrlyq «Temasek» qory 2004 jylǵy transformatsııa nátıjesinde kompanııa kapıtalyn 3 esege, 54 mlrd dollardan 107 mlrd dollarǵa jetkizgen. «Temasekti» memlekettik aktıvterdi basqaratyn jekemenshik kompanııa dep te ataıdy. Joǵary basshylyqtary Úkimetpen taǵaıyndalady, alaıda memleket «Temasekke» eshqandaı jeńildik te, preferentsııa da usynbaıdy. Sıngapýrlyq Qor bırjasyndaǵy jıyntyq qarjylandyrýdyń 21 paıyzy «Temasek» kompanııasynyń aktsııasynan turady», - dedi N. Nazarbaev. Budan bólek, Elbasy dál osyndaı malaızııalyq jáne arab kompanııalaryn mysalǵa ala otyryp, «olardan qaı jerimiz kem?» degen suraqty tótesinen qoıdy. «Bizde múmkindik mol. Qazaqstanda qarajat ta, resýrstar da, eń bastysy bilimdi halyq bar. Bizdiń qazaqstandyqtardyń 98 paıyzy orta bilimge ıe, shetelderde de oqytýdy jalǵastyryp jatyrmyz. Endeshe, osyndaı ozyq tájirıbelerdi paıdalanyp, olardy is júzine asyrý kerek», - dedi N. Nazarbaev.