Álemdik bestsellerlerdi aýdarý qazaq tiliniń qanshalyqty baı ekenin kórsetti - dotsent

ASTANA. QazAqparat - Anglııadaǵy Oksford pen Kembrıdj ýnıversıtetterinde oqytylatyn oqýlyqtardyń qazaq tiline aýdarylýy - bizdiń aýdıtorııa úshin asa mańyzy. L.Gýmılev atyndaǵy Eýrazııa ulttyq ýnıversıtetiniń Qazaq til bilimi kafedrasynyń meńgerýshisi, fılologııa ǵylymdarynyń kandıdaty, dotsent Ardaq Beısenbaı QazAqparat tilshisine osyndaı pikir bildirdi.

«Keshe Elbasy Nursultan Nazarbaevtyń qatysýymen «100 jańa oqýlyq» jobasy aıasynda qazaq tiline aýdarylǵan álemdik jaýharlardyń qataryndaǵy 18 kitaptyń tusaýy kesildi. Sonyń ishinde, áleýmettaný, fılosofııa, psıhologııa, ekonomıka jáne qarjy, til bilimine baılanysty oqýlyqtar oqyrmanǵa jol tartyp otyr. Ózim til mamany bolǵandyqtan, til bilimine qatysty kitaptarǵa basa nazar aýdardym, eki oqýlyq aýdarylypty. Birinshisi - Reseıdiń Svetlana Ter-Mınasovanyń tildik kommýnıkatsııa boıynsha oqýlyǵy. Jalpy, ol kisiniń orys tilindegi kitabymen burynnan tanyspyz. Ózimiz de osy jobanyń aıasynda aýdarýǵa turarlyq kitap retinde usynǵanbyz», - deıdi Ardaq Beısenbaı.

Dotsenttiń paıymyna súıensek, qazaq aýdıtorııasyna mundaı oqýlyqtar asa qajet.

«Til bilimin sheteldik bilimmen baılanystyryp qarastyrý - bilim alýshyǵa da salystyrmaly taldaý túrinde paıdaly bolary anyq. Til bilimine qatysty aýdarylǵan ekinshi kitap - sheteldik ǵalymdardyń «Til bilimine kirispe» degen aýdarmasy. Sholý jasaǵan kezimde kitaptyń sapaly túrde aýdarylǵanyn kórdim. Barlyq jetekshi oqý oryndarynda ol kitaptyń oqytylatynyn eskersek, qazaq aýdıtorııasy úshin de onyń mańyzyn joqqa shyǵara almaımyz», - deıdi ol.

Ardaq Beısenbaı álemdik deńgeıdegi Kembrıdj, Oksford ýnıversıtetterinde oqytylatyn ártúrli ǵylymı kitaptar qazaq tiline tárjimalanǵanyn aıtady.

«Medenjmentke, basqarý júıesine, ekonomıka men fılosofııaǵa baılanysty oqýlyqtardyń birnesheýin qarap shyqtym. Biz jalpy Qazaq fılosofııasy dep te ózimiz bólip qarastyryp ta júrmiz. Qazaq fılosofııasyna deıin barý úshin álemdik fılosofııamen tanysýymyz kerek. Aýdarylǵan osy kitaptar sol maqsatqa jetýde septigin tıgizeri anyq», - deıdi ol.

Dotsent sonymen qatar, aýdarmashylardyń ustanǵan qaǵıdattaryn erekshe atap ótti.

«Sebebi, olar álemge kóptep taralǵan, suranysta júrgen oqýlyqtardy aýdarýǵa basa mańyz bergenin baıqaýǵa bolady. Elbasy óz sózinde «Bul bastama qazaq termınologııasyna ózindik úlesin qosady» dedi. Menińshe, álemdik bestsellerlerdi aýdarý arqyly qazaq tiliniń qanshalyqty baı ekeni kórsetildi. Aýdarmashylardyń da myqty ekenin tanyta bildik. Nege deseńiz, ózge tildegi túpnusqadan qazaq tiline aýdarý - óte qıyn jumys», - dep túıdi Ardaq Beısenbaı.

Eske sala ketsek, keshe Astanadaǵy Nazarbaev ortalyǵynda «Qazaq tilindegi 100 jańa oqýlyq» jobasy aıasynda aýdarylǵan alǵashqy kitaptardyń tanystyrylymy ótken bolatyn. Joba aıasynda bıyl taǵy 30 kitap qazaq tiline aýdarylady.