Álemdegi munaı baǵasyna baılanysty Qazaqstandaǵy munaı kompanııalaryna salyq tómendetilýi múmkin
Onyń sózine qaraǵanda, álemde qaıta ashylyp jatqan ken oryndary munaı óndirýdiń kúrdeli geologııalyq-tehnıkalyq jaǵdaılaryna, ıaǵnı shıkizatty tereńnen óndirýge alyp kelýde. Osy oraıda kóptegen ken oryndarynda munaı qoryn zertteý turǵysynda qymbat tehnologııalardy paıdalaný qajettilik etedi. Munymen qosa, sońǵy kezde álemdegi munaıdyń tómen baǵasy ken ornyn tolyq ıgerýge eleýli túrde yqpal etýde. Sońǵy jyldary munaı óndirýdiń ózindik quny turaqty túrde artyp kele jatqan kórinedi.
«Jer qoınaýyn paıdalanýshylar shyǵystaryn zertteý, sondaı-aq munaı-gaz salasy úshin kúrdeli kezeńde Qazaqstanda óndirý deńgeıin qoldaý múmkindikterin qarastyrý maqsatynda munaı-gaz kompanııalaryna salyqtyq júktemeni túzetý sharalary qaralýda. Taldaý jumystaryna qaraǵanda, bıyl Qazaqstanda munaı sektory boıynsha salyqtyq júkteme koeffıtsenti 75 paıyz shamasynda»,-dedi ol.
Vıtse-mınıstrdiń aıtýynsha, munaıǵa eksporttyq-kedendik baj salyǵy erekshelenýde, ıaǵnı ol barreline sońǵy jyldarda 20 dollardan 80 dollarǵa deıin ósti.
«Eksporttyq-kedendik baj salyǵynyń mólsheri belgilengen deńgeıde tólenedi. Búginde ol álemdik munaı baǵasyna baılanbaǵan jáne atalǵan baj salyǵyn tóleıtinderdiń tıimdiligi deńgeıin eskermeıdi. Joǵaryda atalǵan máselege baılanysty eksporttyq-kedendik baj salyǵynyń tómendeýi men búgingi ahýalǵa qatysty ózge de salyqtardy ońtaılandyrý munaı qunynyń tómen kezeńinde óndirýshi kompanııalarǵa ekonomıkalyq júktemeni tómendetýge múmkindik beredi. Bul óz kezeginde jer qoınaýyn paıdalanýshylarǵa ózderiniń sharttaǵy mindettemelerin oryndaýǵa jol beredi», - dedi U. Qarabalın.
Osy maqsatta bul máseleni qarastyrý turǵysynda Ulttyq ekonomıka mınıstrligi janynan jumys toby quryldy. Onyń quramyna Qarjy, Energetıka mınıstrlikteriniń, «KAZENERGY» qaýymdastyǵynyń jáne «QazMunaıGaz» kompanııasynyń ókilderi tartylǵan.