Álemdegi koronavırýs: Londonda tótenshe jaǵdaı jarııalandy

NUR-SULTAN. QazAqparat – Dúnıejúzilik densaýlyq saqtaý uıymy «omıkron» shtamynyń qaýipti qarqynmen taralyp jatqanyn eskertedi. Nıderland taǵy da qatań lokdaýn engizdi, jańa shtamnyń paıda bolýyna baılanysty Londonda tótenshe jaǵdaı jarııalanyp, Premer-lıganyń alty matchynyń beseýi keıinge qaldyryldy. Bul týraly QazAqparat BBC-ge silteme jasap habarlaıdy.

Statıstıkaǵa sáıkes, pandemııanyń kezekti tolqyny kele jatyr, alaıda vırýsty juqtyrý qarqyny azaıyp keledi. Djons Hopkıns Ýnıversıtetiniń derekteri boıynsha, sońǵy aptada álemde 4,3 mıllıon adam vırýs juqtyrǵan, bir apta buryn bul kórsetkish 4,36 mıllıon bolǵan.

Ashyq derekterge saı, vaktsınalaý qarqyny joǵary: qazirgi jaǵdaı boıynsha álemde 8 mıllıard ekpe salynǵan.

Ulybrıtanııa jańa mýtatsııadan qatty zardap shegýde. Munda úsh kún qatarynan pandemııanyń basynan bergi eń kóp juqtyrý jaǵdaıy tirkelip otyr: ótken juma kúni 93 myń juqtyrý jaǵdaıy tirkeldi, senbi kúni bul kórsetkish azdap tómendedi (90,4 myń). Jańadan paıda bolǵan «omıkron» shtamyn 25 myń brıtandyq juqtyrǵan.

Londonda tótenshe jaǵdaı rejımi jarııalandy

Senbi kúni London meri Sadık Han qalada tótenshe jaǵdaı engizdi. Onyń aıtýynsha, ótken táýlikte indettiń 26 myń jaǵdaıy tirkelgen. Oǵan qosa, vırýs juqtyrǵan medıtsınalyq qyzmetkerler qatary kóbeıip jatyr. Ol aýrýhanaǵa túskenderdiń basym bóliginiń vaktsına almaǵanyn atap ótti. Mer azamattardy tez arada vaktsınanyń úshinshi dozasyn saldyrtýǵa shaqyrdy. Ol úshin jaqyn arada arnaıy jańa vaktsınalaý ortalyqtary ashylmaq.

«Omıkronnyń» saldarynan osy aptada aǵylshyndyq Premer-lıganyń alty oıynynyń beseýi keıinge qaldyryldy. Fýtbolıster arasynda juqtyrý jaǵdaılary kóbeıgen.

Nıderlandta qatań lokdaýn

Epıdemıologııalyq ahýaldyń órshýine baılanysty Nıderland bıligi qatań lokdaýn engizdi. Premer-mınıstr Mark Rıýtte jeksenbiden bastap kúshine enetin karantın sharalaryn jarııalady.

«Nıderland qaıtadan jabylady. «Omıkron» shtamy besinshi tolqynǵa sebepshi bolyp otyr. Bul shtamm biz oılaǵannan da tez taralýda, sol sebepti jaǵdaı ýshyǵyp ketpes úshin áreket etý kerek», - dedi ol senbi kúni baspasóz máslıhatynda.

Qazirgi kezde Nıderlandta juqtyrý qarqyny asa tez emes, oǵan qosa, halyqtyń 85% ekpe saldyrǵan. Alaıda úshinshi dozamen halyqtyń 9% ǵana egilgen. Bul Eýropadaǵy eń tómen kórsetkishterdiń biri. Rıýtteniń aıtýynsha, lokdaýnsyz el aýrýhanalarynda adam aıtqysyz jaǵdaı ornaýy múmkin. Karantın sharalary kem degende qańtardyń ortasyna deıin jalǵaspaq.

Basqa da Eýropa elderi qatań shekteýler engizýde. Ázirge jańa sharalardy engizý týraly Frantsııa, Germanııa jáne Irlandııa málimdedi.

Germanııa Brıtanııadan kelýshilerge karantın engizdi

Dúısenbiden bastap Germanııa Brıtanııadan kelýshilerge karantın rejımin engizedi. Sonymen qatar elge kirý úshin koronavırýsqa testileýdiń teris nátıjesi kórsetilýi tıis.

Budan bylaı el úkimeti Brıtanııany ınfektsııalanǵan aýmaq retinde qarastyratyn bolady. Bul degenimiz, Germanııa shekarasynan ótken azamattardyń barlyǵy eki aptalyq oqshaýlaýdan ótýi tıis degendi bildiredi.

Dúnıejúzilik densaýlyq saqtaý uıymy: «Omıkron» álemniń 89 elinde

Dúnıejúzilik densaýlyq saqtaý uıymnyń habarlaýynsha, «Omıkron» shtamy álemniń 89 eline taralyp úlgergen. Uıym derekterine saı, juqtyrý jaǵdaılary ortasha alǵanda ár úsh kún saıyn eki eselenip otyr.

«Omıkron» «Delta» shtamymen salystyrǵanda anaǵurlym tez juǵady. Sarapshylar Eýropa men AQSh-ta atalmysh shtamnyń kúrt taralýyna alańdaýshylaq bildirýde. Eger qarqyn osylaı jalǵassa, damyǵan elderdiń de densaýlyq saqtaý júıesine qaýip-qater týyndaýy múmkin. DDSU bul, ásirese Ulbyrıtanııa men Ońtústik Afrıka Respýblıkasynyń densaýlyq saqtaý júıesine qaterli ekenin eskertti.