Álemdegi koronavırýs: Qytaı vaktsına tólqujatyn engizdi, Shvetsııada dúken satýshysyz jumys isteıdi

NUR-SULTAN. QazAqparat – Qytaı álemde birinshi bolyp vaktsına tólqujattaryn berý baǵdarlamasyn iske qosty. Al Parıj ben onyń aınalasyndaǵy qalalar koronavırýstyń jańa shtamdarynyń taralýyna tótep bere almaýda. Alaıda bılik jergilikti lokdaýn engizýge asyǵar emes, dep habarlaıdy QazAqparat BBC-ge silteme jasap.

Djons Hopkıns ýnıversıtetiniń málimeti boıynsha, pandemııa kezeńinde álemde 117,2 mıllıon adam aýyryp, 2,6 mıllıon adam qaıtys boldy.

AQSh-taǵy karantınniń alǵash ret jeńildetildi

Eń aýyr epıdemıologııalyq jaǵdaı áli de saqtalyp otyrǵan AQSh-ta vaktsınanyń eki dozasyn alǵan adamdarǵa úı ishinde shaǵyn toptarmen kezdesýge ruqsat etildi. Qoǵamdyq oryndarda maska kııý mindetti bolyp qala beredi.

Bul – Djo Baıden ákimshiligi maquldaǵan alǵashqy jeńildik. Buǵan deıin birqatar memleket shekteýlerdiń kóp bóligin alyp tastaǵan, biraq sheshimder jergilikti deńgeıde qabyldanǵan.

Parıj aýrýhanalarynda bos oryn joq

Frantsııanyń Densaýlyq saqtaý departamentiniń basshysy Jerom Salomon Parıj ben onyń aınalasyndaǵy aýrýhanalar vırýstyń jańa shtamdarynyń taralýyna baılanysty múmkindiginshe qarqyndy jumys jasap jatqandaryn málimdedi. Degenmen bılik óńirlik lokdaýn engizbeıdi.

Parıjde jáne mańyndaǵy astanalyq óńirde Frantsııa halqynyń altydan bir bóligi turady. Densaýlyq saqtaý mınıstrligi aýrýhanalarǵa aýyr haldegi kovıd patsıentterine arnalǵan oryndar bosatý úshin jáne kóbirek qyzmetkerlerdi tartý úshin josparly emdeý kýrstary men protsedýralaryn 40%-ǵa qysqartýdy buıyrdy.

Shvetsııada dúkender taýary satýshysyz satady

Shvetsııanyń aýyldyq jerlerinde azyq-túlik dúkenderi qaıta jandandy, olardyń kópshiligi pandemııaǵa baılanysty jabylýǵa májbúr bolǵan edi. Alaıda olar endi múldem jańa prıntsıp boıynsha jumys isteıdi. Olardyń satýshylary joq jáne jalpy qyzmet kórsetetin mamandary joq, al keıbir saýda núkteleri qurylys vagonyndaı ǵana. Tıisinshe, assortıment tek qajetti taýarlardan turady. Dúkenge táýligine 24 saǵat boıy, kez kelgen ýaqytta dúken ıesiniń arnaıy qosymshasy arqyly kirýge bolady. Ári qaraı, satyp alýshy alǵan zattarynyń kodyn skanerleıdi, al aqsha nesıe kartasynan alynady, ony aldymen tirkeý kerek.

Qytaı vaktsına tólqujattaryn engizdi

Qytaı vaktsına tólqujaty dep atalatyn baǵdarlamany iske qosqan álemdegi alǵashqy el boldy. Bul – vaktsına alǵan Qytaıdyń árbir turǵyny arnaıy tsıfrlyq platformadan júktep, shetelge shyǵýǵa usynatyn qujat. Mundaı tólqujatty engizý týraly áńgime álemniń kóptegen elderinde burynnan beri aıtylyp keledi.

Bastamany jaqtaýshylar bul halyqaralyq shekaralardy tezirek ashýǵa jáne álemdik ekonomıkany qalpyna keltirýge kómektesetinine senimdi.