«Álemdegi eń úzdik daýys ıesi» - Dımashtyń sheteldik jankúıerleri ne deıdi
Ánshiniń keıbir jankúıerleri kontsert ótetin jerge (Indigo at the) birneshe saǵat buryn kelgenderin moıyndady.
«Biz keldik! Shoýdyń bastalýyna bes saǵat qaldy. Mine, Dımashtyń fanattary osyndaı», - dep jazady @thepearlofdimash akkaýntynyń ıesi.
«Men ol jerde boldym! Keremet, sóz joq», - deıdi shoý jaıly @simplyashella.
Álemge áıgili qazaq ánshisiniń fanattary óz kýmırleriniń daýsyna jáne án kezindegi daýystyń sapasyna erekshe tamsanǵandaryn aıtady. elena_nur_shishigina jáne esther.prasetya.dear atty qoldanýshylar «shoýdyń sapasy minsiz» bolǵanyn alǵa tartady.
Otandasymyz kontsert barysynda keıbir ánderin shoýǵa saı dúrkirete aıtsa, keıbirin jan terbeterlik náziktikpen jetkizdi. Onyń biri - S.O.S. d'un terrien en detresse hıtyn ánshi óziniń dosy, Sochı Olımpıadasynyń júldegeri Denıs Tenge arnady. Osy ándi oryndaý barysynda sahnadaǵy alyp ekrannan qaıtys bolǵan mánerlep syrǵanaýshynyń muz aıdynynda kórsetken óneri beınelengen edi.
Óz kezeginde sylviasandoval9010 atty qoldanýshy Dımashty túsinetinin jetkizgen. Ol óz paraqshasynda «Júregiń jaraly kezde osyndaı ándi oryndaý óte qıynǵa túskeni anyq» dese, @pejohpics atty taǵy bir qoldanýshy Denıstiń «sezimtal, muńdy ári keremet jan» bolǵanyn eske alady.
Dımashtyń Meksıkadan kelgen jankúıeri @mjulieta6916 shoýdan keıin óziniń alǵan áserimen bólise kele «Kontserttiń teńdessiz bolǵanyn, Dımashtyń ǵajaıyp ánshi ekenin» jazady.
Eń belsendi kórermenderdiń biri retinde Polshadan kelgen Teresa Kakol-dy atap ótýge bolady. Onyń jeke paraqshasy ánshiniń kontsertiniń vıdeosy men fotolaryna tolyp qalǵan.
«Dımash Qudaıbergenniń Londondaǵy jeke kontserti. Sýperkontsert, mýzykanttardyń fantastıkalyq ansambli men álemdegi eń úzdik daýys ıesi. Rahmet saǵan, Dıma! Sen - Qazaqstannyń maqtanyshysyń», - deıdi Tereza.
Shoý aıaqtalǵannan keıin @ardabaevar óziniń Instagram paraqshasynda «bári de tamasha bolǵanyn» aıta kele «Dımashjan, biz senimen maqtanamyz» deıdi.
Dımashtyń adal tyńdarmandarynyń qatarynda Ýkraınadan kelgender de az emes.
«Osy syılyǵyń úshin rahmet! Men úshin osy kontsert - úlken múmkindik!», - deıdi ýkraınalyq fanat Elena Tıhonova.
Eske sala ketsek, 19 qarashada Londonda Dımash Qudaıbergenniń kontserti ótken bolatyn. «Indigo at the O2» zaly bul kúni kórermenderge lyq toldy. Qazaqstan, Chehııa, Belgııa, Ulybrıtanııa, Qytaı, Kanada, Germanııa, Reseı, Fınlıandııa, Chehııa sekildi álemniń 45 elinen kelgen ánshiniń jankúıerleri kontsert bastalmaı turyp-aq «Dımash» dep daýystap, shoýdyń bastalýyn asyǵa kútti. Eki saǵatqa sozylǵan kontsert kópshilik kútkennen artyq deńgeıde ótkeni anyq. Ánshi sahnadaǵy árbir nómirinde ártúrli kıimmen shyǵyp, tek jandy daýysta án shyrqady.