Álemdegi eń kóne Qurandardyń biri Lývr mýzeıine qoıylady

PARIJ. QazAqparat – Lývr mýzeıindegi kórmege álemdegi eń kóne Qurandardyń biri – VIII ǵasyrda jazylǵan Katta Longar Qurany qoıylmaq. Bul týraly QazAqparat «Anadolu» agenttigine silteme jasap habarlaıdy.

Kóne Quran «Ózbekstan oazısteriniń qazynalary. Kerýen joldarynyń qıylysynda» dep atalatyn kórme aıasynda Lývrde tuńǵysh ret kórsetilmek.

Kórme 24 qarashadan bastap keler jyldyń 6 naýryzyna deıin ashyq bolady. Munda qabyrǵa keskindemeleri, saraılardyń oıyp jasalatyn bólshekteri, sándik-qoldanbaly óner buıymdary sııaqty ártúrli jádigerler ornalastyrylady.

Barlyǵy 168 mýzeı eksponatymen tanysýǵa múmkindik bar: Ózbekstannyń 13 mýzeıinen jetkiziletin 137 buıym, olar bizdiń dáýirimizge deıingi V–VI ǵasyrlardy, ıaǵnı Tımýrıdter kezeńine deıingi zamandy qamtıdy. Sondaı-aq, álemniń ozyq mýzeılerine tıesili 31 buıym qoıylmaq.

Eske salsaq, Ózbekstanda VIII ǵasyrdaǵy Quran kitabyn qalpyna keltirý jumystary aıaqtalyp, ol restavratsııadan keıin kópshilik nazaryna usynylǵan bolatyn. Ǵylymı zertteýlerge sáıkes, Quran kitaby uzaq ýaqyt boıy Ózbekstannyń Qashqadarııa oblysy Qamashın aýdanyndaǵy Langar ota meshitinde saqtalyp kelgen. Mádenıet jáne ónerdi damytý qory men Ózbekstan Musylmandary dinı basqarmasy birlesip uıymdastyrǵan jobaǵa Frantsııanyń belgili Lývr mýzeıiniń mamandary jumyldyryldy.