Álemdegi búgingi ahýal barlyq elderdi qorǵanys qabiletin nyǵaıtýǵa májbúrleýde - QR Prezıdenti
«Ózderińiz de biletindeı, bizdiń elimiz taıaý jáne alys eldermen tatý kórshilikti nyǵaıtýǵa baǵyttalǵan beıbitsúıgishtik saıasat júrgizip keledi. Degenmen, álemdegi búgingi jaǵdaı barlyq elderdi qorǵanys qabiletin nyǵaıtýǵa májbúrlep otyr. Biz de UQShU aıasynda dál osyn jasaýǵa umtylamyz», - dedi Nursultan Nazarbaev.
Memleket basshysynyń atap ótýinshe, qarýly kúshterdiń qorǵanys salasyn damytý memleket basymdyǵynyń biri sanalady. Bul rette, Ortalyq Azııa óńirindegi jalǵyz sanalatyn KADEX halyqaralyq kórmesi qorǵanys salasyn júzege asyrýda negizgi rólge ıe bolyp otyr.
«Osy jyldardyń ishinde ol aýqymdy oqıǵanyń, qorǵanys áleýetin nyǵaıtý men elder arasyndaǵy áskerı-ónerkásiptik yntymaqtastyqty damytýdyń tıimdi alańdarynyń birine aınaldy. Jańa tehnologııalyq dáýir qaýipsizdikti qamtamasyz etýde de, ekonomıkany odan ári jańǵyrtýda da atalǵan salanyń aıryqsha mańyzdylyǵyn aıqyndaıdy»,- dedi Elbasy.
Osy rette, Qazaqstan Prezıdenti «KADEX-2018» qarý-jaraq jáne áskerı-tehnıkalyq múlik kórmesi alǵash ret QR Qorǵanys jáne aeroǵarysh ónerkásibi mınıstrliginiń qamqorlyǵymen ótip jatqanyn eske saldy.
«Baǵdarlama óziniń formaty men mazmuny jaǵynan barynsha tolyqqandy jáne biz baıqap otyrǵan jahandyq geosaıası turaqtylyqtyń órshýi jaǵdaıynda barynsha ózekti», - dedi Nursultan Nazarbaev.
Aıta keteıik, elordanyń halyqaralyq áýejaıynyń áskerı sektory aýmaǵynda V halyqaralyq «KADEX-2018» qarý-jaraq jáne áskerı-tehnıkalyq múlik kórmesi óz jumysyn bastady.
Ashylý rásiminde Qazaqstan Prezıdenti KADEX kórmesiniń basty ereksheligin atady.
Shara barysynda otandyq 17 kásiporyn áskerı tehnıkanyń 57 birligi men áskerı azamattyq maqsattaǵy 162 buıymnyń tusaýkeserin ótkizbek.