Álemdegi barlyq azyq-túliktiń úshten biri qoqys jáshigine tastalady

NUR-SULTAN. QazAqparat - Dúnıejúzilik azyq-túlik baǵdarlamasynyń (DAB) derekteri boıynsha, ǵalamshardaǵy barlyq azyq-túliktiń úshten biri qoqys jáshigine tastalady, dep habarlaıdy QazAqparat BUU resmı saıtyna silteme jasap.

Ǵalamdyq ekonomıka osynyń saldarynan jyl saıyn shamamen trıllon dollar joǵaltady.

Ásirese, taǵamdardy molynan qoıatyn merekelik kúnderdegi dastarhandarda ysyrapqy jol berilip keledi. Al as qaldyqtary qoqys tógetin jáshikterge tastalady.

DAB qyzmetkerleri meıramhanalar men dúkenderdi, sondaı-aq jurtshylyqty artyq as ázirlemeýge, ony qoqysqa tastamaýǵa shaqyrady.

BUU álemde jyl saıyn 4 mıllıard tonna azyq-túlik shyǵarylatyndyǵyn, eger tıimdi bólinse jáne oryndy paıdalanylsa, munyń ǵalamshardyń barlyq turǵyndaryna jetetindigin eske salady.