Álemdegi jańa jel qýatynyń 65%-y Qytaıǵa tıesili

<p>BEIJІŃ. KAZINFORM &ndash; Qytaılyq jel týrbınasynyń tórt óndirýshisi ótken jyly saladaǵy eń úzdik bes alpaýyttardyń qataryna endi. Qytaıdyń úlesine 2023 jyly álemdegi jańa jel qýatynyń 65%-y tıdi. Buǵan Wood Mackenzie halyqaralyq konsaltıngtik kompanııasynyń keltirgen málimetteri dálel.</p>

Olardyń esebine sáıkes, bul – qytaılyq kompanııalardyń osy saladaǵy birinshi jetistigi. Rekordtyq kórsetkishter Qytaıdyń ishki naryǵyndaǵy jel energııasy býmynyń arqasynda múmkin boldy. 

Reıtınginiń kóshbasshysy Goldwind Science & Technology Co. Ltd. kompanııasy boldy. Ol ótken jyly 16,3 gıgavatt (GVt) týrbına ornatqan. Danııalyq Vestas Wind Systems A/S kompanııasy úzdik «bestikke» kirgen jalǵyz batys óndirýshisi atandy.

Degenmen, naryq «konsolıdatsııalanǵan» bolyp qala beredi. Wood Mackenzie halyqaralyq konsaltıngtik kompanııasynyń málimetinshe, alǵashqy «bestik» álemdik jel naryǵynyń 54%-yn baqylaıdy.

Qytaıdyń jel energııasy qaýymdastyǵynyń esebine sáıkes, ótken jyly Qytaıdyń qurlyqtyq bóliginde jańadan ornatylǵan jel energııasynyń qýaty 59,3 paıyzǵa ósip, 79,4-ǵa jýyq GVt-qa jetti. 

Qytaı óndirýshileri 2022 jylǵa qaraǵanda 60%-ǵa kóp jel qondyrǵylaryn eksporttady, olardyń jalpy kólemi shamamen 3,7 GVt-ty qurady. 

Atalmysh elde jasalǵan týrbınalar 18 memleketke eksporttaldy. Ózbekstan, Mysyr, Ońtústik Afrıka, Laos jáne Chılı 2023 jyly satyp alýshylardyń «bestigine» kirdi. Bul jalpy kólemniń 65%-dan astamyn quraıdy.