«Álemdegi eń baqytsyz pil» qaıtys boldy

<p>Fılıppınde 30 jyldan astam jalǵyz ómir súrýge májbúr bolǵan &laquo;álemdegi eń baqytsyz pil&raquo; qaıtys boldy, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi <a href="https://www.independent.co.uk/asia/southeast-asia/mali-manila-zoo-saddest-elephant-dies-b2455324.html" target="_blank" rel="noopener">The Independent</a> basylymyna silteme jasap.</p>

Fılıppın astanasy Manıladaǵy haıýanattar baǵynda Vıshva Maalı nemese qysqasha Malı degen pil ómir súrdi. Ol shamamen 43 jyl ómir súrgen, biraq onyń naqty jasy belgisiz.

Bul janýar 30 jyldan astam ýaqyt boıy osy haıýanattar baǵynda jalǵyz pil bolǵany úshin de tanymal. Sol sebepti «People for the Ethical Treatment of Animals» (PETA) qaıyrymdylyq uıymy Malıdi «álemdegi eń baqytsyz pil» dep atady.

Malı Fılıppınge 1988 jyly Shrı-Lankadan eldiń sol kezdegi birinshi hanymy Imelda Markosqa syılyq retinde ákelindi. Pil óziniń alǵashqy aılaryn Manıla haıýanattar baǵynda Shıva esimdi basqa pilmen birge ótkizdi.

Biraq 1990 jyly Shıva óldi, sodan beri Malı Manıla haıýanattar baǵynda óz túriniń jalǵyz ókili boldy, óıtkeni mekemeniń basqa pil satyp alýǵa aqshasy bolmaǵan.

Janýarlar quqyǵyn qorǵaýshylar birneshe ret Malıdi basqa elge kóshirýge keńes berip, Manıla haıýanattar baǵynyń basshylyǵyn synǵa aldy.

PETA 2005 jyly Malıdi qonystandyrý boıynsha dúnıejúzilik naýqandy bastady.

Aktsııaǵa Nobel syılyǵynyń laýreaty Djon Maksvell Kýtsı, ánshi Pol Makkartnı, aktrısa Brıjıt Bardo jáne basqa da tanymal tulǵalar qosyldy. Biraq aqyry bul bastama amalǵa aspady jáne Malı 30 jyldan astam ýaqyt boıy, ıaǵnı búkil derlik ómirin jalǵyz ótkizdi.

Foto: The Independent

2022 jyly Manıla haıýanattar baǵynyń kireberisine mekemeniń sımvoly jáne Fılıppındegi jalǵyz pil retinde Malı músini ornatyldy.

Haıýanattar baǵynyń bas veterınary, doktor Genrıh Patrık Penıa-Domıngonyń aıtýynsha, Malı sońǵy kezderi denesin qabyrǵaǵa ysqylap, ishki aýyrsynýdy baıqatqan.

28 qarashada janýardyń jaǵdaıy nasharlap, búıirimen jatyp, aýyr tynys alǵan.

Haıýanattar baǵynyń veterınarlary oǵan antıgıstamınder men vıtamınder bergen, biraq ol sol kúni tústen keıin qaıtys bolǵan.

Aýtopsııa nátıjesinde Malıde uıqy beziniń qaterli isigi bar ekenin anyqtalǵan.

PETA haıýanattar baǵy men Fılıppın úkimetin pildiń densaýlyǵyna qatysty problemalardy elemeı, ony ondaǵan jyldar boıy «jeke kamerada» ustady dep aıyptap otyr.