Álemde jumyssyzdar sany 200 mln. adamdy quraıdy - Memleket basshysy
Búgin VI Astana ekonomıkalyq forýmy men Daǵdarysqa qarsy dúnıejúzilik konferentsııanyń saltanatty ashylýy barysynda sóz sóılegen QR Prezıdenti Nursultan Nazarbaev osylaı málim etti.
Memleket basshysy sóz arasynda álem jurtshylyǵynyń áleýmettik deńgeıiniń tómendeý máselesine toqtala kele, jahandyq jumyssyzdyq deńgeıi de úzdiksiz ósip otyrǵanyn atap ótti.
«Dúnejúzilik eńbek uıymynyń boljamdy málimetterine qaraǵanda, aǵymdaǵy jyldyń ózinde álemde jumyssyzdar sany 200 mln. adamdy qurady. Aǵymdaǵy jyldyń basynda-aq Eýropada 26 mln. jumyssyz tirkelgen bolatyn. Bul osydan 5 jyl burynǵy kórsetkishpen salystyrǵanda 1,5 esege kóp», - dedi N. Nazarbaev.
Bul rette Elbasy kóptegen memleketterde bilim berýge, densaýlyq saqtaý men adamı áleýetti damytýǵa baǵyttalǵan shyǵystar qysqaryp jatqanyn aıtyp, bunyń barlyǵy jahandyq áleýmettik daǵdarystyń kórinisi ekenine toqtaldy.
«Osynyń ózin adamnyń, jalpylama damyǵan qoǵamnyń ómir súrýine tónip turǵan qater deýge bolady. Oksford sarapshylarynyń baǵalaýy boıynsha jalpylama az qamtylǵan adamdardyń basym bóligi «Úlken jıyrmalyq» toby memleketterinde ómir súrip jatyr. 250 mln.-ǵa tarta adam jaıly ómir izdep, áleýmettik problemalardan bas saýǵalap kóship-qonýda. Sonymen birge, basym memleketterdegi oryn alǵan áleýmettik ádiletsizdik qarjy-ekonomıkalyq tıimsizdiktiń, daǵdarystyń kórinisi bolyp tabylady», - dedi N. Nazarbaev.