Álemde jumyssyzdar «armııasy» 30 mln. adamǵa kóbeıýi ábden múmkin - Halyqaralyq eńbek uıymy

ASTANA. 6 qyrkúıek. QazAqparat - Aldaǵy ýaqytta álemdegi jumyssyzdar «armııasy» taǵy 30 mln. adamǵa kóbeıýi ábden múmkin. Reseıdiń Sankt-Peterbor qalasynda ótip jatqan G20 sammıtinde Halyqaralyq eńbek uıymynyń Bas dırektory Gaı Raıder osylaı aıtty.

Onyń habarlaýynsha, bıyl álem boıynsha 200 mln. jumyssyz adam tirkeldi. Olardyń 93 mln-y «Úlken jıyrmalyq» - «G20» elderinde turady. «Bizdi alańdatyp otyrǵan bir másele, álemdik ekonomıka ósiminiń saqtalýyna qaramastan, jumyssyzdardyń sany azaıar emes. Eger búgingi jaǵdaı aǵymdaǵy stsenarıı boıynsha damı beretin bolsa, onda 2015 jylda álemdegi jumyssyzdar «armııasy» taǵy 30 mln. adamǵa kóbeıýi ábden múmkin», - dep eskertti G. Raıder G20 sammıtine qatysýshy memleket basshylaryn.