Álemde tyrysqaq órshýi múmkin: Qazaqstan jańa epıdemııaǵa daıyn ba

ASTANA. QazAqparat – QR DSM Sanıtarlyq-epıdemıologııalyq baqylaý komıteti juqpaly aýrýlardy qadaǵalaý basqarmasynyń basshysy Roza Qojapova álemde tyrysqaqtyń órshý qaýpi jáne elimizdiń jańa epıdemııaǵa daıyndyǵy týraly aıtyp berdi, dep habarlaıdy QazAqparat tilshisi.

Onyń aıtýynsha, vedomstvo aýyz sýdyń da, ashyq sý qoımalaryndaǵy sýdyń da sapasyn turaqty negizde tekseredi.

«Dúnıejúzilik densaýlyq saqtaý uıymy tyrysqaqtyń álemde taralý qaýpin óte joǵary dep atady. Bizdiń elimizde barlyq aýyldardyń ortalyq sýmen qamtamasyz etilmeıtinin eskersek, osyndaı qaýip bar ma?» - dep surady jýrnalıst Ortalyq kommýnıkatsııalar qyzmetinde ótken baspasóz máslıhatynda.

Juqpaly aýrýlardy qadaǵalaý basqarmasynyń basshysy bıyl álemniń birqatar elderinde, negizinen Afrıka elderi men Sırııada tyrysqaqpen syrqattanýdyń asqynýy baıqalǵanyn rastady.

«Biraq, Qazaqstan aýmaǵynda sońǵy 10 jyl ishinde tyrysqaq aýrýy tirkelgen joq. Tyrysqaq – adamnan adamǵa sý arqyly tikeleı juǵatyn aýrý. Turaqty negizde aýyz sýdyń da, ashyq sý qoımalaryndaǵy sýdyń da sapasyna baqylaý júrgiziledi. Ashyq sý aıdyndarynda qozdyrǵyshtardyń, onyń ishinde tyrysqaqtyń bolý-bolmaýy únemi zertteledi. Búgingi tańda osy zertteýlerdiń nátıjeleri boıynsha bizdiń elde tyrysqaq aýrýy taraýy múmkin degen qaýip joq», - dep túsindirdi Roza Qojapova.

Soǵan qaramastan, birqatar elderde tyrysqaq aýrýy tirkelgenin eskere otyryp, memlekettik shekarada elge kelgen azamattardy baqylaý, tekserý júrgiziledi.

«Ol adamdardan aýrý tabylsa, birden oqshaýlanady. Medıtsınalyq kómekke júgingen adamdardyń aýrý tarıhy naqtylanady. Eger adamdar shetelden kelse jáne olarda uqsas aýrý baıqalsa, epıdemııaǵa qarsy sharalar júrgizilip, oqshaýlanady. Alaıda, búgingi tańda ashyq sý qoımalaryn zertteý nátıjeleri boıynsha jaǵdaı tynysh», - dep tolyqtyrdy dáriger.

Buǵan deıin dárigerler aktsııa boıynsha jaramdylyq merzimi ótken ónimderdi satý máselesin kótergen edi.