Álemde taǵy retsessııa bolýy múmkin – Halyqaralyq valıýta qory

NUR-SULTAN. QazAqparat – Halyqaralyq valıýta qory jahandyq ekonomıka damýy jónindegi aldaǵy eki jylǵa arnalǵan boljamyn ózgertti, dep habarlaıdy QazAqparat Euronews agenttigine silteme jasap.

Boljamnyń nasharlaýyna sebepterdiń biri — ınflıatsııanyń qarqyndy ósýi jáne sonyń saldary retinde Ortalyq bankterdiń saıasatty qatańdatýy.

HVQ bazalyq mólsherlemeni kóterýdiń ekonomıkalyq turǵyda teris áseri bolatyny sózsiz, biraq ony keshiktirýdiń saldary odan da aýyr bolar edi dep atap ótti.

«Álemdik ekonomıka pandemııa, Reseı men Ýkraınadaǵy jaǵdaıdan áli qalpyna kelgen joq. Qazir biz jaǵymsyz ári belgisiz perspektıva aldynda turmyz. Jahandyq óndiris ósimi bıyl 3,2%, kelesi jyly 2,9% tómendeıdi dep otyrmyz, al ınflıatsııa kerisinshe damyǵan elderde 6,6% jáne naryǵy endi qalyptasyp jatqan jáne damýshy elderde 9,5% joǵarylaıdy dep qaıta qaraldy. Álemniń eń iri úsh ekonomıkasy — AQSh, Qytaı, Eýropa tyǵyryqqa tireldi», — dedi HVQ bas ekonomısi Per-Olıve Gýrınsha.

HVQ pandemııaǵa baılanysty álemdik retsessııadan eki jyldan keıin dúnıe júzinde taǵy da retsessııa bolýy múmkin ekenin joqqa shyǵarmaıdy.

Reseıdiń jalpy ishki ónimi quldyraıdy degen boljamyna qatysty bıylǵysyn -6% deńgeıine deıin jaqsartty, biraq endigi jylǵa boljam nasharlap otyr —-3,5%.

Bul reseılik sarapshylardyń eń negatıvti boljamyna sáıkes keledi.