Álemde sońǵy bir aptada koronavırýstan qaıtys bolǵandar sany 10% ósti

JENEVA. TASS-QazAqparat – Ótken aptada álemde 4,1 mıllıon adam koronavırýs ınfektsııasyn juqtyrdy, 52,5 myńnan asa adam kóz jumdy. Dúnıejúzilik densaýlyq saqtaý uıymynyń (DDSU) habarlaýynsha, aldyńǵy kúndermen salystyrǵanda, jańa juqtyrý jaǵdaılary 2%-ǵa, ólim kórsetkishi 10%-ǵa artqan, dep habarlaıdy QazAqparat TASS agenttigine silteme jasap.

«Ótken apta kórsetkishimen salystyrǵanda, ólim sany 10%-ǵa ósip, 52,5 myńnan asa adam qaıtys bolǵan», - delingen DDSU-nyń epıdemıologııalyq bıýlleteninde.

Qujatta keltirilgen statıstıkaǵa saı, 29 qarasha men 5 jeltoqsan aralyǵynda 4,1 mıllıon adam vırýs juqtyrǵan. Bul ótken aptamen salystyrǵanda 2%-ǵa kóp.

29 qarasha men 5 jeltoqsan aralyǵynda álem boıynsha 4 105 073 adam vırýs juqtyryp, 52 641 adam qaıtys bolǵan. Sońǵy apta boıynsha eń kóp juqtyrý jaǵdaıy AQSh-ta (752 393) tirkelgen. Bestikke Germanııa (396 429), Ulybrıtanııa (310 696), Frantsııa (283 500) jáne Reseı (231 240) kiredi.

Vırýs juqtyrǵandar arasynda delta shtamy anyqtalǵandar úlesi – 99,8%. Al omıkron shtamy vırýs juqtyrǵandardyń 0,1%-ynan anyqtalǵan.

Alfa, beta jáne gamma shtamdarynyń úlesi 0,1%-dan tómen, dep málimdedi DDSU. Jańa «omıkron» shtamy 57 elde anyqtalǵan.