Álemde qazaqstandyq «Múlikti satý boıynsha elektrondyq saýda-sattyqtar» jobasy úzdik dep tanyldy

ASTANA. QazAqparat - Qarjy mınıstrliginiń «Múlikti satý boıynsha elektrondyq saýda-sattyqtar» jobasy álemdegi eń úzdik bolyp tanyldy. Bul týraly búgin Ortalyq kommýnıkatsııalar qyzmetindegi baspasóz máslıhatynda «Aqparattyq esepteý ortalyǵy» AQ basqarma tóraǵasy Janasyl Ospanov málim etti.

Atalǵan joba «Qolaıly orta» dárejesi boıynsha «2015 jylda Aqparattyq qoǵam máseleleri joǵary deńgeıdegi kezdesýleriniń tańdaýly jobalary» atty Jenevadaǵy halyqaralyq baıqaýda úzdik dep ataldy. «Baıqaýǵa álemniń 70 elinen 18 sanat boıynsha 300-den astam jobalar usynyldy. Qazaqstan Respýblıkasy tarapynan 6 joba qaralýǵa usynyldy. «Qolaıly orta» sanatynda bizdiń joba jeńimpaz dep tanyldy», - dedi Ospanov. «C6 Enabling Environment» (Qolaıly orta) sanaty boıynsha «Múlikti satý boıynsha elektrondyq saýda-sattyqtary» qazaqstandyq jobasymen birge baıqaýda 10 eldiń jobalary qatysty, onyń ishinde, Reseı, Polsha, Sıngapýr, Kolýmbııa, Meksıka, Saýd Arabııasy, Kýveıt, Benın elderi bar. «Sarapshylardyń pikirinshe, bul baıqaý ІT-tehnologııalar jáne telekommýnıkatsııalar aıasynda «Oskar» kınosyılyǵyna parapar sanalady jáne bul jerdegi júldeler búkil álemde bedeldi ári tanymal bolyp tabylady», - dedi ol. «AKT jańartpalaryn birigip júzege asyrýdaǵy turaqty damýǵa qolaıly jaǵdaı jasaý» uranymen 2015 jyldyń tańdaýly jobalary jeńimpazdaryn jarııalaý bıylǵy 26 mamyrda (Shveıtsarııa) Jeneva qalasynda saltanatty marapattaý barysynda júrgizildi. Bul baıqaý osy jyly óziniń 150 jyldyǵyn atap ótken Elektr baılanysy halyqaralyq odaǵy tarapynan ótkizildi.