Álemde qaterli isik dendep barady

ASTANA. QazAqparat – Qaterli isik — álemdegi eń kóp taralǵan aýrýlardyń biri. Dúnıejúzilik densaýlyq saqtaý uıymynyń málimetinshe, álemde árbir altynshy ólim onkologııalyq aýrýlarǵa baılanysty, dep habarlaıdy QazAqparat tilshisi.

Finprom.kz portalynyń málimetinshe, qaterli isiktiń eń kóp taraǵan túrlerine sút bezi qaterli isigi, ókpe qaterli isigi, toq ishek jáne tik ishek qaterli isigi, qýyqasty bezi qaterli isigi kiredi. Our World in Data-nyń pandemııaǵa deıingi dereginshe, 2019 jyly qaterli isiktiń ár túrinen 10,1 mln adam qaıtys boldy. Bul 1990 jylmen salystyrǵanda birden 75,1 paıyzǵa artyq.

Kóbine qaterli isik saldarynan eń kóp adam shyǵyny Batys-Tynyq muhıty aımaǵynda (3,6 mln adam), Eýropada (2,3 mln adam) jáne Amerıkada (1,6 mln adam) tirkeldi. Ońtústik-Shyǵys Azııada qaterli isikten - 1,5 mln adam, Afrıkada - 533,6 myń adam, Shyǵys Jerorta teńizi aımaǵynda 477,4 myń adam qaıtys boldy.

Qaterli isik túrleriniń ishinde 1990 jylmen salystyrǵanda analyq bez isiginen (85%, 10,8 myń jaǵdaıǵa deıin) jáne Hodjkın lımfomasynan (0,2%, 27,6 myń jaǵdaıǵa deıin) kisi ólimi azaıdy.

Qaterli isikten kóp jaǵdaıda 70 jastan asqan adamdar (4,9 mln-nan astam adam) qaıtys bolady. 50-69 jas aralyǵyndaǵy naýqastardyń 4 mln-y, al 15-49 jas aralyǵyndaǵy 1,1 mln adam qaterli isikten kóz jumdy.

Balalar men jasóspirimderdiń statıstıkasyna keler bolsaq, 5 jasqa deıingiler arasynda 44,5 myń bala, 5-14 jas aralyǵyndaǵy 54,9 myń bala onkologııalyq aýrýlardan baqılyq bolǵan.