Álemde bilim ordalaryn tańdap damytý beleń alyp barady - UNESCO sarapshysy

NUR-SULTAN. QazAqparat - Nazarbaev Ýnıversıtetinde ótip jatqan halyqaralyq konferentsııada UNESCO sarapshysy álemniń keıbir elderinde naqty bir ýnıversıtetke ǵana basymdyq berý beleń alyp bara jatqanyn másele retinde kóterdi, dep habarlaıdy QazAqparat tilshisi.

Gonkong ýnıversıtetiniń magıstratýralyq baǵdarlamalar úılestirýshisi Anatolıı Oleksıenko zamanaýı bilim berý júıesin arnaıy ınfraqurylymsyz elestetý múmkin emes ekenin atady. Onyń pikirinshe, zamanaýı ınfraqurylym jalpyǵa qoljetimdi bolǵanda ǵana qoǵam damýy tıimdi baǵytta júzege aspaq.

«Ǵylym ıntegratsııasyna keıin qosylyp jatqan keıbir memleketter bilim berý ınnovatsııalaryn belgili bir ýnıversıtetterge ǵana engizýmen áýestenip ketti. Innovatsııa shekaramen shektelmeýi kerek. Mundaı úrdis álem qaýymdastyǵyn qatty alańdatatdy» - dedi Anatolıı Oleksıenko.

UNESCO sarapshysy úzdiksiz bilim berýdiń álemdegi ozyq tájirıbelerin transformatsııalaýda Qazaqstan tájirıbesi sátti dep esepteıtinin jetkizdi.

«Bul turǵyda - Qazaqstan jasap jatqan eksperıment óte durys. Úzdik bilim oshaǵynyń tájirıbesin ýaqytpen synap, keıin jappaı taratý arqyly Qazaqstan bilim júıesin zaman aǵymyna sátti sáıkestendirip jatyr. Top-talanttar shaqyrý arqyly jalpy júıeni jetildirýge bolady. Osyndaı sátti tájirıbe retinde Ońtústik-Shyǵys Azııa elderine baǵyttalǵan «Bolashaqtyń ýnıversıteti» jobasyn aıtýǵa bolady» - dedi ol.