Álemde ashyqqan halyq sany tórt jylda 122 mln adamǵa artty - BUU

ASTANA. QazAqparat – BUU bes mamandandyrylǵan mekemesi ázirlegen azyq-túlik qaýipsizdigi boıynsha jańa baıandamaǵa sáıkes, pandemııa, ekstermaldy aýa raıy jáne shıelenister, sonyń ishinde Ýkraınadaǵy soǵys saldarynan 2019 jyldan beri álemde ashyqqan adamdar sany 122 mln adamǵa artqan, dep habarlaıdy QazAqparat BUU jańalyqtaryna silteme jasap.

BUU bul úrdis ózgermese, 2030 jylǵa qaraı ashtyqty joıýǵa qatysty turaqty damý salasyndaǵy maqsatqa qol jetpeıtinin eskertti.

«Jahandyq pandemııadan keıin bárin qalpyna birkelki qalpyna keltirý múmkin bolmady, al Ýkraınadaǵy soǵys azyq-túlik pen durys tamaqtanýǵa kedergi keltirdi. Klımattyń ózgerýi, qaqtyǵystar jáne ekonomıkalyq turaqsyzdyq saldarynan margınaldy toptardyń qaýipsizdigin qamtamasyz etý qıynǵa túsip jatyr. Biz ádettegi jumys ádisterinen bas tartýymyz kerek», - dep atap ótti Birikken Ulttar Uıymy Azyq-túlik jáne aýyl sharýashylyǵy uıymynyń (FAO) bas dırektory Tsıýı Dýnıýı.

2023 jylǵy baıandamada 2022 jyly 691 mıllıonnan 783 mıllıonǵa deıin adam ashyqqany aıtylǵan (ortasha máni - 735 mıllıon).

Bul COVID-19 pandemııasy bastalǵanǵa deıingi 2019 jylmen salystyrǵanda 122 mln adamǵa kóp.

2021-2022 jyldary álemde ashtyqtyń ósýi toqtady, biraq álemniń kóptegen elderinde azyq-túlik daǵdarysy kúsheıe tústi.

2022 jyly Azııa men Latyn Amerıkasynda ashtyqqa qarsy kúres baıqaldy, alaıda Batys Azııada, Karıb teńizinde jáne Afrıkanyń barlyq sýbaımaqtarynda ashtyq deńgeıi ósti.

Eń qatty zardap shekken aımaq - Afrıka: qurlyqta árbir besinshi adam ashtyqqa ushyraıdy, bul álemdik ortasha kórsetkishten eki ese kóp.