Álemde 40 kún aptap ystyq bolatyny ras pa

ASTANA. QazAqparat – WhatsApp jelisinde 40 kún boıy álemde aýa temperatýrasy Tselsıı boıynsha 50 gradýsqa deıin kóteriletini týraly aqparat tarap jatyr. Mundaı aýytqýshylyqtar ár 60 jyl saıyn bolyp turady-mys. Anyq-qanyǵyn Stopfake.kz anyqtap kórdi, dep habarlaıdy QazAqparat.

«Eń aldymen, habarlamada qoldanylǵan termınologııaǵa nazar aýdarǵan jón. Onda «mysyq kúnderi» týraly jazylǵan. Meteorologııada da, klımatologııada da mundaı termın joq.

Sondaı-aq habarlamada aýa temperatýrasynyń 50 gradýsqa deıin kóteriletini boljanyp otyrǵan naqty aımaqtar kórsetilmegen. Bir ýaqytta Jerdiń barlyq kontınentinde mundaı jaǵdaıdyń oryn alýy ekitalaı. Mundaı kúmándi pikirler habarlamanyń feık ekendiginiń belgisi. Ýaqyt pen geografııalyq belgilerdiń bolmaýynan ony kez kelgen jerde jáne kez kelgen ýaqytta taratýǵa bolady.

Ár 60 jyl saıyn qaıtalanatyn 40 kún boıy bolatyn aptap ystyq týraly teorııaǵa keletin bolsaq, ony jelide ońaı tekserýge bolady. Shyn máninde, aýa temperatýrasynyń kóterilýi turaqty ári alpys jyl saıyn oryn almaıdy. Sońǵy jyldary álemde rekordtyq joǵary temperatýra jıi tirkelýde. Máselen, 2022 jyly Eýropada ystyq boldy, al 2023 jyly temperatýranyń rekordty kórsetkishteri Azııa elderinde tirkelýde.

Munyń sebebi – Jerdegi klımattyń ózgerýi. Parnıktik gaz shyǵaryndylarynyń kóp bolýyna baılanysty planetanyń joǵary betinde temperatýra joǵarylaıdy.

Demek, taralǵan aqparat feık jáne oǵan senbegen jón», - dep jazady saıt.