Álemde 345 mıllıon adam ashtyqtan zardap shegýde - BUU

AMMAN.QazAqparat – Birikken Ulttar Uıymy Dúnıejúzilik azyq-túlik baǵdarlamasynyń basshysy álemde 345 mıllıon adam «buryn-sońdy bolmaǵan aýqymdaǵy jahandyq tótenshe jaǵdaıǵa» aınalyp bara jatqan ashtyqqa ushyraǵanyn eskertti, dep habarlaıdy QazAqparat BUU-ǵa silteme jasap.

Beısenbi kúni ótken BUU Qaýipsizdik Keńesiniń otyrysynda uıymnyń Dúnıejúzilik azyq-túlik baǵdarlamasynyń (DAB) atqarýshy dırektory Devıd Bızlı agenttik jumys isteıtin 82 elde 345 mln adam azyq-túliktiń jetispeýshiligin qatty sezingenin málimdedi.

Onyń aıtýynsha, bul kórsetkish pandemııaǵa deıin azyq-túlik qaýipsizdigin qatty sezingen adamdar sanynan 2,5 ese kóp.

«Álem buryn-sońdy bolmaǵan kólemdegi jahandyq tótenshe jaǵdaıǵa tap boldy. 345 mıllıonǵa jýyq adam ashtyqtan zardap shegip, ólýge shaq qaldy, al Ýkraınadaǵy soǵys saldarynan 70 mıllıonǵa jýyq adam oǵan jaqyndap tur», - dedi Bızlı.

Onyń pikirinshe, bıyl aqpanda Reseıdiń Ýkraınada soǵys qımyldary bastalǵannan keıin azyq-túlik, janar-jaǵarmaı men tyńaıtqysh baǵasynyń kúrt ósýi 70 mln adamdy asharshylyqqa jaqyndatty.

Odan bólek, Ýkraınadaǵy soǵys ınflıatsııany kúsheıtip, Iemendegi gýmanıtarlyq daǵdarysty ýshyqtyrdy, óıtkeni Taıaý Shyǵystaǵy bul el tolyǵymen derlik azyq-túlik ımportyna táýeldi.

«Eger biz áreket etpesek, 2023 jyly azyq-túlik baǵasynyń aǵymdaǵy daǵdarysy azyq-túliktiń qoljetimdilik daǵdarysyna aınalýy múmkin», - dep boljady Bızlı.

Qaýipsizdik Keńesiniń otyrysynda aldymen Efıopııa, Nıgerııanyń soltústik-shyǵysynda, Ońtústik Sýdan men Iemende azyq-túlik qaýipsizdigi men asharshylyq qaýpi talqylandy.

Alaıda Bızlı men BUU Bas hatshysynyń gýmanıtarlyq máseleler jónindegi orynbasary Martın Grıffıts, sondaı-aq, Somalıdegi azyq-túlik daǵdarysy jaıly eskertti. Bul rette Grıffıts asharshylyqqa ushyraıtyn elder tiziminde Aýǵanstandy birinshi orynǵa qoıdy.

Ol azyq-túlik qaýipsizdiginiń bolmaýy beıbit turǵyndar ólimi men zardap shegýine ákeletin qaqtyǵystar men zorlyq-zombylyqtyń tikeleı jáne janama áseriniń nátıjesi ekenin atap ótti.

«Bul otbasylardy tabys pen azyq-túlikke táýeldi jerlerin tastap ketýge májbúr etip, ekonomıkalyq quldyraýǵa jáne budan bylaı azyq-túlik baǵasyn tóleı almaýyna ákeledi», - dedi ol.

Grıffıts Qaýipsizdik keńesin qaqtyǵystardy toqtatý jáne gýmanıtarlyq operatsııalardy qarjylandyrýdy arttyrý áreketin toqtatpaýǵa shaqyrdy.

Foto: news.un.org