Álem halqyn beıbitshilikke shaqyratyn jańa jahandyq qozǵalys qajet – Qasym-Jomart Toqaev

<p>Memleket basshysy Qasym-Jomart Toqaev Álemdik jáne dástúrli dinder kóshbasshylary sezi hatshylyǵynyń HHІ otyrysyna qatysýshylarǵa quttyqtaý joldady. Prezıdent quttyqtaýyn Senat tóraǵasy Máýlen Áshimbaev oqyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform&nbsp;</a>agenttigi.</p>

«Asa mártebeli din ókilderi, qadirli meımandar! Barshańyzdy álemdik jáne dástúrli dinder kóshbasshylary sezi hatshylyǵynyń HHІ otyrysynyń ashylýymen shyn júrekten quttyqtaımyn! Bıyl alǵashqy sezdiń shaqyrylǵanyna - 20 jyl. Bul ıgi bastama óziniń ómirsheńdigin dáleldep, az ýaqyttyń ishinde mańyzdy órkenıetaralyq dıalog alańyna aınaldy. Forým dinaralyq tatýlyq pen kelisimdi nyǵaıtýǵa, búkil adamzatqa ortaq túıtkilderdiń sheshimin tabýǵa jáne toleranttylyqty dáripteýge septigin tıgizip keledi. Bas qosý aıasynda álemniń rýhanı kóshbasshylary jahan jurtshylyǵyn alańdatqan ózekti máselelerdi talqylap, beıbitshilikti saqtaý jáne ózara qurmet pen syılastyqty nasıhattaý týraly oılaryn ortaǵa salady», - dedi Memleket basshysy quttyqtaýynda.

Prezıdent qazir geosaıası ahýal ýshyǵyp, túrli syn-qaterler kúsheıip turǵanyna nazar aýdartty.

«Osy almaǵaıyp kezeńde izgilik, meıirimdilik baýyrmaldyq, jaýapkershilik sııaqty qaǵıdattardyń qadiri arta tústi. Sondaı-aq halyqaralyq qaýipsizdiktiń jańa júıesin qalyptastyrý óte mańyzdy máselege aınaldy. Ol úshin álem halqyn beıbitshilikke shaqyratyn jańa jahandyq qozǵalys qajet. Bul rette din kóshbasshylary aıryqsha ról atqarady. Rýhanı lıderler osy baǵytta kúsh jumyldyryp, barsha adamzatqa ortaq problemalardy sheshýge súbeli úles qosady dep senemin. Hatshylyqtyń búgingi otyrysy da osy maqsatqa oraı uıymdastyrylyp otyr. Qazaqstan dinaralyq jáne órkenıaralyq yntymaqtastyqqa negiz bolatyn bastamalarǵa árdaıym qoldaý kórsetedi. Ony syrtqy saıasattyń negizgi basymdyqtarynyń biri retinde usynady», - dedi Qasym-Jomart Toqaev.