Álem chempıonynyń áýleti «Mereıli otbasy» atandy

NUR-SULTAN. QazAqparat – Elordadaǵy «Qazaqstan» ortalyq kontsert zalynda «Mereıli otbasy» ulttyq konkýrsynyń qorytyndy kontserti ótip jatyr, dep habarlaıdy QazAqparat tilshisi.

Qyrkúıektiń ekinshi jeksenbisi Qazaqstanda Otbasy kúni retinde toılanady. Osy aıtýly dataǵa oraı, elordada «Mereıli otbasy» konkýrsynyń jeńimpazdary marapattaldy. Eldegi 14 oblys pen 3 respýblıkalyq mańyzdaǵy qalanyń namysyn qorǵap kelgen úzdik otbasylar astana tórinde qoshemetke ıe boldy.

Marapattaý rásimine qatysqan QR Premer-Mınıstriniń orynbasary Berdibek Saparbaev jeńimpaz januıalarǵa Prezıdent Qasym-Jomart Toqaevtyń quttyqtaý hatyn oqyp berdi.

«Halqymyzdyń ulttyq jáne otbasylyq dástúrlerge beriktigi qoǵamdaǵy rýhanı qundylyqtardyń saqtalýyna yqpal etedi. Bul memlekettik is-shara – Qazaqstannyń áleýmettik saıasatynyń mańyzdy bóligi. Elimizde jyl saıyn halyqtyń ómir súrý jaǵdaıyn, turmys sapasyn jaqsartýǵa baǵyttalǵan mańyzdy sheshimder qabyldanýda. Elbasy bastamasymen merekeler kúntizbesine Otbasy kúni meıramy engizildi. Yrys-berekesi men yntymaǵy jarasqan máýeli áýletterdi nasıhattaıtyn «Mereıli otbasy» ulttyq baıqaýyn ótkizý dástúrge aınaldy. Bul sharalar san ǵasyrlar boıy qalyptasqan ulttyq-ádet ǵuryptardyń, salt-dástúrlerdiń jańǵyrýyna, otbasy ınstıtýtynyń nyǵaıýyna, urpaq tárbıesine jańasha mán berip, ónegeli áýletterdiń órisin nyǵaıtýǵa yqpal etedi. Bul konkýrsqa qatysýshylardyń barlyǵyn jeńimpazdar dep aıtýǵa bolady. Óıtkeni, osy konkýrsqa qatysqan árbir otbasy mereıli», - delingen Memleket basshysynyń quttyqtaýynda.

Jyldaǵydaı bul joly da elimizdiń eń «Mereıli otbasyn» anyqtaýǵa barsha qazaqstandyqtar atsalysqan bolatyn. SMS-pen jáne ınternet arqyly daýys berý nátıjesinde atyraýlyq Tilekqabylovtar áýletine «Mereıli otbasy» ulttyq konkýrsynyń laýreaty» ataǵy berildi. Jeńimpaz januıaǵa otandyq «SaryarqaAvtoProm» JShS shyǵarǵan shaǵyn avtobýstyń kilti tabystaldy.

Áýlettiń tiregi bolǵan eńbek ardageri, bilim salasynyń qurmetti qyzmetkeri, Aǵartý isiniń úzdigi, Inder aýdanynyń qurmetti azmaty Tólesh Tilekqabyluly qazir ómirde joq. Áýlet anasy Aımedet Qabdeshqyzynyń jasy 82-de. Kitaphanashy bolyp jumys istegen ájeı «Altyn alqa», «Eńbek eri» medalderiniń ıegeri. Qazir ol 8 baladan 28 nemere, 16 shóbere súıip otyr. Nemereleriniń beseýi mektepti «Altyn belgimen» aıaqtasa, úsh nemeresi «Qyzyl dıplom» ıegeri atanǵan. Abylaı Tólesh atty nemeresi - pankratıonnan álem chempıony, jaýyngerlik sambodan álem kýboginiń eki dúrkin kúmis júldegeri.

Eske salsaq, «Mereıli otbasy» ulttyq baıqaýyna bıyl 3204 otbasy qatysqan bolatyn. Alty jylda atalmysh konkýrsta 15 197 otbasy baq synapty. Onyń 62 paıyzy - aýyl januıalary, 3 paıyzy - kópbalaly otbasylar, 18 paıyzy - jas oshaqtar, 17 paıyzyn eńbek dınastııalary quraǵan.