Álem chempıony bolǵan Qazaqstan boksshylary qansha syıaqy alady

ASTANA. QazAqparat – Bokstan álem chempıony bolǵan sportshylar qansha syıaqy alady? Bul suraqqa Mádenıet jáne sport mınıstri Ashat Oralov jaýap berdi, dep habarlaıdy QazAqparat tilshisi.

«Mınıstrlik tarapynan álem chempıondarynyń árqaısyna 15 myń dollardan beremiz jáne olardyń bapkerlerine de 15 myń dollar qarastyrylǵan. Qazaqstan boks federatsııasy tarapynan – 100 myń dollar, AIBA tarapynan 200 myń dollar beriledi, - dedi Ashat Oralov búgin elorda áýejaıynda bokstan álem chempıonatynyń jeńimpazdary men júldegerin qarsy alý saltanatynda.

Eske salaıyq, Qazaqstan boks federatsııasynyń prezıdenti Keńes Raqyshev Tashkenttegi álem chempıonatynda jeńimpaz atanǵan sportshylarymyzǵa óz qarajaty esebinen qosymsha 100 myń dollardan beretinin aıtqan edi.

Sonymen birge mınıstr álem chempıonatyndaǵy jetistikti – tarıhı uly jeńis dep málimdedi.

Qosa ketsek, búgin jeńimpazdardyń alǵashqy legi elge oraldy. Chempıondardyń ekinshi toby – Sanjar Táshkenbaı men Nurbek Oralbaı Astana ýaqytymen saǵat 16:00-de elordaǵa qonady.

Aıta keteıik, Qazaqstan quramasy Ózbekstanda ótken álem chempıonatyn 4 altyn, 1 kúmis medalmen aıaqtady.