Álem chempıony Aslanbek Shymbergenovke 3 bólmeli páter berildi
Ózbekstandaǵy álem birinshiliginde óner kórsetken jambyldyq eki boksshy: Ulttyq qurama kapıtany Aslanbek Shymbergenov – altyn, Dýlat Bekbaýov kúmis medal jeńip alǵan bolatyn.
Arnaıy uıymdastyrylǵan saltanatty sharada oblys ákimi Nurjan Nurjigitov qos boksshyny jeńispen quttyqtap, jerlesteriniń atynan marapattady.
«Álemdik básekede kók Týymyzdy bıikke kótergen órenderimiz Aslanbek pen Dýlatty aıtýly jeńisimen shyn júrekten quttyqtaımyn! Jambyl boks mektebiniń jarqyn dástúrin saqtaǵan sportshylarymyz ózderin naǵyz sheber boksshy ekendigin osy álem birinshiliginde dáleldeı bildi.
1999 jyly Hıýstonda ótken álem chempıonatynda Bolat Jumádilov altynnan alqa taqsa, araǵa 24 jyl salyp Aslanbek Shymbergenov sol jeńisti, sol erlikti qaıtalap otyr. Bul biz úshin úlken qýanysh, joǵary mártebe. Boksshylarymyzdy úlken rıngke baýlyp, halyqaralyq dárejedegi sport sheberi deńgeıine kótergen QR eńbegi sińgen jattyqtyrýshy Nurlan Aqúrpekov pen Ermek Ertaevtardyń eren eńbekterin de aıryqsha atap ótkim keledi»,– degen oblys basshysy boksshylardyń ata-analaryna da rızashylyǵyn jetkizdi.
Sondaı-aq saltanatty sharada álem chempıony Aslanbek Shymbergenovke 3 bólmeli páterdiń kilti tabystaldy.
Al jeńimpazdyń jeke bapkeri, joǵary sanatty jattyqtyrýshy Ermek Ertaevqa 5 mıllıon teńgeniń sertıfıkaty berildi.
Álem chempıonatynyń kúmis júldegeri Dýlat Bekbaýov 2 bólmeli páterdiń kiltine ıe bolsa, jeke bapkeri Nurlan Aqúrpekovke 3 mıllıon teńgeniń sertıfıkaty tabystaldy.
Eske salaıyq, keshe Prezıdent Qasym-Jomart Toqaev bokstan bıylǵy álem chempıondary – Sanjar Táshkenbaı, Mahmud Sabyrhan, Aslanbek Shymbergenov, Nurbek Oralbaı jáne kúmis medal ıegeri Dýlat Bekbaýovty, sondaı-aq bokstan Qazaqstan ulttyq quramasynyń músheleri men bapkerlerin qabyldaǵan bolatyn.
Búgin Aslanbek Shymbergenovke Qorǵanys mınıstri Rýslan Jaqsylyqov «El qorǵany» medalin tabys etti.