Álem chempıony Aıda Imaqanova: Táýelsiz eldiń namysyn qorǵaý - úlken baqyt

ORAL. QazAqparat - Elbasynyń «Rýhanı jańǵyrý» baǵdarlamasy aıasynda «100 jańa esim» jobasyna Batys Qazaqstannan usynylǵan jandardyń biri - Zelenov aýdany Beles orta mektebiniń 11-synyp oqýshysy, karateden úsh márte álem chempıony Aıda Imaqanova. «QazAqparat» tilshisi jas bolsa da, qazirdiń ózinde biraz bıiktikti baǵyndyryp úlgergen A.Imaqanovamen tildesken edi.

- Aıda, sportqa qalaı keldiń, aldymen soǵan toqtalsań?

- Jeti jasymnan karatemen shuǵyldanyp, jattyǵýǵa qatysa bastadym. Buǵan ata-anam qarsy bolǵan joq, qaıta qýattap, maǵan dem berip otyrdy. Ákemniń jas kezinde kúrespen aınalysqany bar, ózimnen keıin inim Islambek ósip keledi. Jalpy, otbasymyzǵa sport bóten emes. Jattyǵýlar qansha qıyn bolsa da, moıymaýǵa tyrystym. Óıtkeni qandaı tabys-jeńistiń de tókken ter men qajyrly eńbektiń arqasynda keletinin jaqsy túsinemin. Aldymen aýdandyq, oblystyq jarystarda baq synasam, keıin respýblıkalyq dodalarda talaı ret júldeger atandym. Osy ýaqytqa deıin kúmis pen qolany aıtpaǵanda, qyryqqa jýyq altyn medal jeńip alǵan ekenmin. Qazirgi kezde sport sheberligine úmitkermin, qara beldiktiń І dan ıegerimin. El basyna qıyn-qystaý kún týǵanda, Mánshúk, Álııa, Hıýaz apalarymyz Otanymdy qorǵaımyn dep, qan maıdanǵa attansa, beıbit kúnde táýelsiz Qazaqstan namysyn qorǵaý  qandaı baqyt deseńizshi!

- Endeshe, basty tabystaryń qandaı?

- Ulttyq qurama sapynda Túrkııa, Reseı, Japonııa sııaqty elderde baq synadym. Ózge memlekette týymyzdyń kókke kóterilgenin kórý - baqyt ári úlken maqtanysh. Alǵash ret 2012 jyly Túrkııanyń Ystanbul qalasynda ótken álem chempıonatyna qatysyp, chempıon atandym. Sodan keıin 2015 jylǵy tamyzda Japonııa astanasy Tokıoda Karate-do shotokan dúnıejúzilik federatsııasynyń 25 jyldyǵyna arnalǵan chempıonat ótti. Bul týrnırde álemniń 37 elinen eki myńnan astam sportshy baq synady. Osy jarysta jeti kezdesýimniń bárin jeńispen aıaqtap, ekinshi márte álem chempıony atandym. Al bıyl 23-25 maýsymda Serbııa astanasy Belgrad qalasynda taǵy bir dúnıejúzilik doda ótip, oǵan 23 elden eki myńnan astam sportshy qatysty. Munda da baǵym janyp, úshinshi márte jeńis tuǵyryna kóterildim. Meniń osyndaı tabystarǵa jetýim úshin rýhanı dem beretin ájem Zylıha men tynbaı jattyqtyryp kele jatqan jeke bapkerim Farhat Jalmýrzınge aıryqsha alǵysymdy bildirgim keledi.

- Aıda, sport sabaǵyńa keseldik keltirmeı me?

- Joq, oraıyn keltirseń, bárine de ýaqyt tabýǵa bolady. Buǵan dálel - karatemen úzbeı aınalysyp júrsem de, mektepte oqý úzdigimin. Tereń bilim alsam ǵana jolymnyń jarqyn bolatynyn túsinemin. Bizdiń elimizde oqýǵa da, sportpen shuǵyldanýǵa da tolyq jaǵdaı jasalǵan. Sondyqtan Abaı atamyz aıtqandaı, «eki keme quıryǵyn» qatar ustap kelemin.

Aıta keteıik, Aıdanyń bapkeri, Qazaqstan JKS, WSKF ókili,  5 dan qara belbeý ıegeri, QR sport sheberi, «Qazaqstan Karate do Setokaı» JQB tóraǵasy, aýdandyq balalar-jasóspirimder sport mektebiniń jattyqtyrýshysy Farhat Jalmýrzın shákirtiniń bolashaǵynan úlken úmit kútedi. «Keleshekte Aıda Qazaqstan quramasy sapynda jazǵy olımpıada oıyndaryna qatyssa eken dep armandaımyn. Ázirge sporttyń qaı túrinen ekenin bilmeımin, bálkim, taekvondodan baǵymyzdy synap kórermiz», dedi F.Jalmýrzın.