Álem chempıonyna qurmet: astanalyqtar Edige Emberdini áýejaıda qoshemetpen qarsy aldy
Aýyr atletıkadan 19-27 qyrkúıek kúnderi Ispanııanyń Leon qalasynda ótken jastar arasyndaǵy jahandyq dodada Qazaqstan quramasy sapynan 89 kelidegi Edige Emberdi ekinshi márte top jardy.
Atalǵan jarysta 16 salmaq dárejesi boıynsha 64 memleketten 350 sportshy kúsh synasty. Al Edige chempıon atanǵan 89 kelide 20 sportshy synǵa tústi. Alǵashqy julqa kóterýde jerlesimiz nebári 5-orynǵa turaqtaǵanymen, serpe kóterý saıysynda Edige qarsylastarynan basym tústi.
«89 kelide óner kórsetýim jaraqat alý múmkindigin azaıtady. Sondyqtan 81 kelige salmaq qýýdy jón dep sanamadyq. Álem chempıonatyndaǵy salmaǵym 85 keli boldy. Qarsylastarymnan kishi bolsam da, bul chempıon atanýyma esh kedergisin keltirmedi. Ári men úshin jaqsy tájirıbe boldy. Biraq 81 keliden túpkilikti kettim dep aıta almaımyn. Aldaǵy iri dodalarda 81 kelide óner kórsetemin», - dedi Edige Emberdi.
Jastar arasyndaǵy Álem chempıony Edige Emberdi budan da jaqsy nátıje kórsetýine ne kedergi bolǵanyn túsindirdi.
«Álem chempıonatyna daıyndyq barysynda bilegimdi jaraqattap aldym. 1-2 aptanyń ishinde tezirek emdeýge tyrystym. Nátıjesinde Ispanııa tórinde baq synadym. Biraq julqa kóterý jattyǵýynda budan da jaqsy kórsetkishti tirkeýge bolar edi degen kishkene ókinishim bar», - dedi ol.
19 jastaǵy elordalyq sportshy buǵan deıin 2022 jyly jasóspirimder jáne 2023 jyly Meksıkanyń Gvadalaharasynda ótken jastar arasyndaǵy álem chempıonatynda da qarsylas shaq keltirmegen bolatyn.
Eske sala keteıik, Edige Emberdi aýyr atletıkadan jastar arasynda álem chempıony atanǵanyn jazǵanbyz.