Álem chempıony Sáken Bıbosynovqa Túrkistannan berilgen páter tóńireginde daý shyqty

<p>Túrkistan oblysynda álem chempıonyna arendalyq páter berilgen, dep habarlaıdy <a href="Kazinform" target="_blank" rel="noopener">Kazinform</a>.</p>

Áleýmettik jeli belsendileri sportshyǵa tabystalǵan páterdiń arendalyq ekendigin aıtyp, jelide qyzý talqylap jatyr. Máselen, Oljas Mamyr esimdi túrkistandyq azamat Sákenge berilgen baspana onyń atyna áli aýdarylmaǵandyǵyn jetkizdi.

«Túrkistan oblysynyń eks-ákimi Ómirzaq Estaıuly bokstan Tokıo olımpıadasynyń qola júldegeri, álem chempıony Sáken Bıbosynovqa páter kiltin tabystaǵan bolatyn. Páter «Syrdarııa» turǵyn úı kesheninde ornalasqan edi. Biraq bunyń bári ótirik bolyp shyqty. Ol úıdi Sákenniń atyna áli aýdarmaǵan. Berilgen baspana arendalyq úı», - dep jazdy ol.

Al, Túrkistan oblysynyń dene shynyqtyrý jáne sport basqarmasy atalǵan máseleni sheshýge demeýshiler tartylyp jatqanyn jetkizdi.

«Durys jaǵynan túsinińizder. Bul páter arendalyq negizde berilgen. Alaıda demeýshiler tarapynan máseleni sheshý úshin jumystar júrip jatyr. Páter Sáken Bıbosynovtyń menshigine beriledi», - delingen jaýapta.

Bul másele boıynsha boksshy Sáken Bıbosynovpen de sóılesip, máseleni ózinen suradyq.

«Basqa oblystar chempıondaryna úsh bólmeli páter berip jatyr. Al, maǵan berilgen eki bólmeli páter arendalyq bolyp shyqty. Men sol sebepten Túrkistanǵa qonys aýdarmadym. Ózimniń de kóptegen josparlarym men jobalarym bar edi. Sonyń biri túrkistandyq jas boksshylardy sportqa baýlý bolatyn. Páter máselesi sheshilmegendikten olardy júzege asyrý ázirge múmkin bolmaı otyr», - dedi ol.