Álem chempıony Marııa Brovkova BQO-nyń úzdik sportshysy atandy

<p>Baıdarka men kanoe esýden jasóspirimder men jastar arasynda eki dúrkin álem chempıony, bıylǵy Azııa oıyndarynyń kúmis jáne qola júldegeri Marııa Brovkova BQO-da jyldyń úzdik sportshysy atandy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Saltanatty is-shara kezinde M.Brovkovaǵa «Olımpıadalyq sport túrlerinen úzdik sportshy» atalymy boıynsha marapatty oblys ákimi Narıman Tóreǵalıev tabys etti.

«Aldaǵy jyly Parıj olımpıadasy ótetini málim. Osyndaı álemdik dodada sportshylarymyzdan jaqsy nátıje kútemiz. Qazirgi kezde batysqazaqstandyq Marııa Brovkovanyń esimin kópshilik jaqsy biledi. Osy jáne basqa eskekshilerimiz jattyǵatyn bazada qos qabatty ǵımarat salmaqshymyz. Mine, tıisti jaǵdaı týǵyza bilsek, el namysyn abyroımen qorǵaıtyn jastarymyzdyń kóptep shyǵatynyna senim mol», - dedi oblys ákimi.

Shara barysynda, sondaı-aq dzıýdodan jasóspirimder arasynda álem chempıony Nurlan Isataev – «Jyl serpilisi», short-trekten halyqaralyq dárejedegi sport sheberi, 2023 jylǵy Leık-Plesıdtegi HHHІ Búkilálemdik qysqy ýnıversıadanyń kúmis júldegeri Alına Ájiǵalıeva – «Úmit artar sportshy», áıelder kúresinen 23 jasqa deıingiler arasynda Azııa chempıonatynyń kúmis júldegeri Zeınep Baıanova men dzıýdodan eresekter arasynda QR chempıonatynyń kúmis júldegeri Nursultan Zaızaǵalıev «Sporttyq minez úshin» atalymymen marapattaldy.

Dzıýdodan eresekter arasynda Azııa kýboginiń jeńimpazy Ańsarbek Ǵaınýllın – «Turaqty sporttyq jetistik úshin», baıdarka men kanoe esýden BQO-nyń aǵa jattyqtyrýshysy, M.Brovkovanyń anasy ári bapkeri Elena Brovkova – «Úzdik bapker – 2023», BQO dzıýdo federatsııasy (prezıdenti Rýstam Shaıhıev) – «Úzdik sporttyq federatsııa», Olımpıada rezerviniń oblystyq mamandandyrylǵan mektep-ınternat-kolledji «Úzdik sporttyq uıym» atalymyna ıe boldy.

Paradzıýdodan halyqaralyq dárejedegi sport sheberi, ІV Azııa paralımpıada oıyndarynyń qola júldegeri Talǵat Ájiǵalıev – «Paralımpıadalyq sport túrlerinen úzdik sportshy», toǵyzqumalaqtan oqýshylar arasynda álem chempıony Samıra Orazmuhambet – «Ulttyq sport túrlerinen úzdik sportshy», halyqaralyq dárejedegi sport sheberi, kıokýshınkaı karateden eresekter arasynda álem chempıony Nurgúl Saparova «Olımpıadalyq emes sport túrlerinen úzdik sportshy» ataǵyn jeńip aldy.

Sport ardagerleri men sala qyzmetkerlerine basqa da marapattar tapsyryldy.