Álem chempıonatynda júldeger bolǵan boksshylarǵa Keńes Raqyshev $600 myń berdi

ALMATY. QazAqparat - 31 mamyr kúni Almatyda bokstan erler men áıelder arasyndaǵy álem chempıonatynyń jeńimpazdary men júldegerlerin marapattaý rásimi ótti. Sportshylar men bapkerler Qazaqstan boks federatsııasynyń prezıdenti Keńes Raqyshevtyń jeke qarjysynan aqshalaı sertıfıkat aldy, dep habarlaıdy QazAqparat.

Tashkentte álem chempıony atanǵan Sanjar Táshkenbaı, Mahmud Sabyrhan, Aslanbek Shymbergenov jáne Nurbek Oralbaı 100 myń AQSh dollarymen marapattalsa, kúmis júldeger Dýlat Bekbaýovqa 50 myń AQSh dollary berildi.

Sonymen qatar, Raqyshev myrza Dýlatqa qymbat shveıtsar saǵatyn da syılady.

Bul kúni názik jandy boksshylarymyz da marapattaldy. Nıý-Delıde ótken álem birinshiliginiń fınalısteri Karına Ibragımova men Lıazzat Kúngeıbaeva otandyq boks basshysynan 30 myń AQSh dollaryn aldy.

Qola júldegerler: Alýa Balqybekova, Valentına Halzova jáne Farıza Sholtaı 10 myń AQSh dollary kólemindegi syıǵa ıe boldy.

Quramamyzdyń jeńiske jetýine zor úlesin qosyp júrgen komanda ókilderi – bapkerlik quram, keńesshiler, keshendi ǵylymı top músheleri de nazardan tys qalmady.

Shtattaǵy jattyqtyrýshylar men jeke bapkerler, dárigerler, massaj jasaýshylar jáne basqa mamandar 1 myńnan 15 myń AQSh dollary kóleminde syıaqy aldy.

«Álem chempıonaty kezinde bizge ystyq qoldaý kórsetken búkil Qazaqstan halqynan taǵy da alǵys aıtamyn. Federatsııa, komanda úshin bul úlken mártebe. Biz árqashan senimdi aqtaýǵa tyrysamyz. Qazir Qazaqstan quramasy álemdik boks reıtınginde kósh bastap tur. Memleket basshysy Qasym-Jomart Toqaev chempıondarymyzdy alǵashqylardyń biri bolyp quttyqtady. Elge oralǵannan keıin boksshylardy Aqordada qabyldap, marapattady. Bul eńbegimizdiń elengenin, baǵalanǵanyn bildiredi. Búgingi is-sharamyz erekshe ekenin aıtyp óteıin. Óıtkeni, biz sportshylar men bapkerlerdi ǵana emes, alǵashqy ret chempıondarymyzdyń analaryn da marapattap otyrmyz. Budan bylaı bul dástúrge enedi dep oılaımyn. Alyp anadadan týady, sondyqtan, aq analarymyzǵa úlken alǵys aıtamyn», - dedi quttyqtaý sózinde Keńes Raqyshev.

Elimizdiń birneshe qalasynan arnaıy kelgen chempıondardyń analaryna Keńes Raqyshev gúl men 2 mıllıon teńgeniń sertıfıkatyn syılady.

Ózbekstan astanasyndaǵy tamasha nátıje úshin erler quramasynyń bas jattyqtyrýshysy Myrzaǵalı Aıtjanovqa 25 myń AQSh dollaryna qosa, QBF kólik mińgizdi.

Jekeleı syılyqtardy eseptemegende, marapattaýdyń jalpy júlde qory - 600 myń AQSh dollary.

Aıta keteıik, Nıý-Delıdegi áıelder arasyndaǵy XIII álem chempıonatyna 65 elden 300 boksshy qatysty.

Bas bapker Shamıl Safıýllınniń shákirtteri tuńǵysh ret sheteldegi jarysta 6 júlde ıelenip, keremet nátıje kórsetti.

Úndi rınginde Karına Ibragımova men Lázzat Kúngeıbaeva kúmispen kúptelse, Alýa Balqybekova, Valentına Halzova jáne Farıza Sholtaı qola júlde ıelendi.

Qazaqstan erler quramasyna keletin bolsaq, bas bapker Myrzaǵalı Aıtjanovtyń shákirtteri XXII álem chempıonatynda 5 medalǵa ıe bolyp, jalpykomandalyq esepte ekinshi orynnan kórindi.

4 altyn jáne 1 kúmis júlde - qazaqstan boksynyń tarıhynda syrttaǵy jarysta kórsetken úzdik nátıje boldy.

Tashkent rınginde Sanjar Tashkenbaı, Mahmud Sabyrhan, Aslanbek Shymbergenov, Nurbek Oralbaı jáne Dýlat Bekbaýov kózge tústi.

Qazaqstan táýelsizdik alǵannan keıin bizdiń boksshylar álem chempıonattarynda 18 altyn medal alǵan.

Onyń altaýyn sońǵy eki álem birinshiliginde Serbııa (2021 jyly) jáne Tashkent (2023 jyly) ıelengen.