Álem chempıonatynda jartylaı fınalǵa shyqqan boksshy qyzdar jekpe-jek jaıynda pikir bildirdi

ASTANA. QazAqparat – Úndistannyń Nıý-Delı qalasynda ótip jatqan áıelder arasyndaǵy álem chempıonatynda keshki sessııada jartylaı fınalǵa shyqqan qazaqstandyq boksshylar jekpe-jegi jóninde oı bólisti, dep habarlaıdy QazAqparat tilshisi.

El quramasynan Nadejda Rıabets (66 keli) Kabo-Verde ókili Ivanýsa Gomes Moreıradan basym tústi.

«Bul - meniń 66 keli salmaqta qatysyp otyrǵan alǵashqy álem chempıonatym. Qarsylas atanǵan sportshylardyń barlyǵynyń boıy menen bıik boldy. Sáttilik pen daıyndyq arqasynda jartylaı fınalǵa deıin jettim. Alda eki jekpe-jegim qaldy. Senimdi aqtaýǵa tyrysamyn. Jankúıerlik jasaǵan barsha azamattarǵa alǵys aıtamyn», - dedi Nadejda Rıabets.

Al Valentına Halzova (75 keli) túrkııalyq Elıf Gıýnerıdi tize búktirdi.

«Búgingi jekpe-jektiń alǵashqy eki raýndy tartysty ótti. Bapkerlerim qarsylasymnyń qarqynyn qaıtarýǵa keńes berdi. Ony oryndaýǵa bar kúshimdi saldym. Oılaǵanymyz júzege asty. Men álem chempıonatyna jeńis úshin keldim. Jankúıerlerge rızashylyǵymdy bildiremin», - dedi Valentına.

Sondaı-aq, 81 keliden joǵary salmaqta Lázzat Kúngeıbaeva úndistandyq Nýpýrdyń osal tusyn tapty.

«Men jartylaı fınalǵa joldamany úndistandyq boksshymen sarapqa saldym. Azdaǵan qobaljý boldy. Endi aldaǵy jekpe-jegimde ázerbaıjandyq boksshymen kezdesemin. Buǵan deıin ekeýimiz eki márte sheberlik baıqasqan edik. Jeńiske jetemin degen oıdamyn», - dedi Lázzat.

Sondaı-aq, el quramasynan Alýa Balqybekova (48 keli), Karına Ibragımova (57 keli), Farıza Sholtaı (81 keli) jartylaı fınalǵa joldama aldy.

Al Mádına Nurshaeva (70 keli), Jaına Shekerbekova (54 keli), Rımma Volosenko (60 keli) qarsylastaryna ese jiberip qoıdy.