Álem chempıonatynda taǵy bir qazaqstandyq boksshy qyz medalǵa ilikti

YSTANBUL. QazAqparat - Bokstan áıelder arasyndaǵy álem chempıonatynda búgin el quramasynan Jaına Shekerbekova jartylaı fınalǵa shyqty. Osylaısha 1/2 fınalǵa joldama alǵan qazaqstandyq boksshylardyń sany ekeýge artty, dep habarlaıdy QazAqparat tilshisi.

Dúbirli dodada Jaına Shekerbekova (52 keli) Olena Savchýkpen qolǵap túıistirdi.

Jekpe-jek tartysty ótti. Tóreshilerge jeńgen boksshyny qıynǵa soqty. Nátıjesinde tóreshilerdiń basym bóligi qazaqstandyq boksshynyń jeńgenin atap ótti.

Osylaısha Jaına Shekerbekova jartylaı fınalǵa joldama aldy.

Eske salsaq, budan buryn mundaı jetistikke el quramasynan Alýa Balqybekova (48 keli) qol sozǵan edi.

Aıta ketsek, jarystyń atalǵan satysyna jetken boksshy kem degende qola medalge qol jetkizedi.

Endi el quramasynan Karına Ibragımova (57 keli), Valentına Halzova (70 keli), Gúlsaıa Erjan (81 keli) shırek fınalda synǵa túsedi.

Álem chempıonaty Túrkııanyń Ystanbul qalasynda ótip jatyr. Dúbirli doda 20 mamyrda máresine jetedi.