Álem chempıonaty: Erkin kúresten Ádil Ospanov jubanysh beldesýine qatysady

ASTANA. QazAqparat - Serbııa astanasy Belgrad qalasynda ótip jatqan kúres túrlerinen álem chempıonatynda búgin, 18 qyrkúıekte erkin kúresten Ádil Ospanov jubanysh beldesýine qatysady, dep habarlaıdy QazAqparat tilshisi.

Álemdik básekede 65 keli salmaqta baq synap jatqan qazaqstandyq balýan jubanysh beldesýinde Ońtústik Koreıa sportshysy ıÝn Tszıýn Sak pen vengrııalyq Ismaıl Mýshýkaev jubynyń jeńimpazymen bozkilemge shyǵady. Atalǵan beldesýde jeńip jatqan jaǵdaıda qola júldeni ázerbaıjandyq Gadjı Alıevpen sarapqa salady.

Aıta ketsek, qazaqstandyq balýan dúbirli dodanyń irikteý satysynda moldovalyq Vıtalıı Býnındi 4:1 esebimen tize búktirse, odan keıin qyrǵyzstandy Alıbek Osmonovty 6:3 esebimen jeńdi. Shırek fınalda ırandyq Rahman Amýzadqa jeńilip qaldy.

Rahman Amýzadtyń fınalǵa shyǵýyna baılanysty Ádil Ospanov jubanysh beldesýine qatysýǵa múmkindik aldy.

Medaldar kestesinde Qazaqstan quramasy 1 kúmis, 2 qola medalmen 17 orynda keledi. Alǵashqy úshtikte Japonııa, AQSh, Túrkııa balýandary tur.

Álem chempıonaty búgin, 18 qyrkúıekte máresine jetedi.

Eske salsaq, budan buryn áıelder kúresinen Jámıla Baqbergenova kúmis júlde aldy.

Sondaı-aq budan buryn grek-rım kúresinen Aıdos Sultanǵalı qola júldeger atandy.

Al erkin kúresten Azamat Dáýletbekov qola júlde aldy.

Foto: olympic.kz