Álem chempıonaty: Búgin el quramasynan eki dzıýdoshy beldesedi

ASTANA. QazAqparat - Katarda ótip jatqan dzıýdodan álem chempıonatynda el quramasynan 10 mamyrda synǵa túsetin sportshylardyń qarsylastary anyqtaldy, dep habarlaıdy QazAqparat tilshisi.

Bul kúni erler quramasynan Abylaıhan Jubanazar (81 keli) men áıelderde Esmıgúl Quıýlova (63 keli) tatamı tórinde taıtalasqa túsedi.

Qazaqstandyq Abylaıhan Jubanazar alǵashqy beldesýinde portýgalııalyq Jýan Fernandýmen sheberlik baıqassa, Esmıgúl Quıýlovanyń ekinshi irikteý satysyndaǵy qarsylasy - Kamıla Badýrova.

Beldesýler «Qazsport» telearnasynan elorda ýaqytymen 13.30, 20.00-de tikeleı efırde kórsetiledi.

El quramasynan 9 mamyrda erler arasynda 73 keli salmaqta Jansaı Smaǵulov, Danııar Shamshaev, áıelderde Baqyt Qusaqbaeva alǵashqy irikteý satylarynda jeńilip qaldy.

Al odan buryn Ǵusman Qyrǵyzbaev (66 keli), Tolǵanaı Ábeýova (52 keli), Eldos Smetov pen Nurqanat Serikbaev (60 keli), Abıba Ábýjaqynova men Ǵalııa Tynbaeva (48 keli) jarysty erte aıaqtady.