Álem chempıonaty: Shaıbaly hokkeıden Qazaqstan áıelder quramasy Belgııany jeńdi

<p>ASTANA. KAZINFORM - Shaıbaly hokkeıden Qazaqstan áıelder quramasy ekinshi dıvızıonnyń A tobynda tórtinshi jeńisine qol jetkizdi.</p>

Atalǵan oıyndar 7 sáýirden bastap Andorra memleketinde ótip jatyr. Jarysty qazaqstandyq hokkeıshiler sátti ótkizip keledi. 

Búgingi Belgııa quramasymen kezdesýdi qazaqstandyq hokkeıshiler belsendi bastady. Birinshi kezeńde qatarynan bes shaıba soǵyp ketti.

Oıynnyń 3-mınýtynda Larısa Svırıdova esep ashsa, odan keıin Dılnaz Saıahatqyzy 4, Ekaterına Kýtsenko 6, Malıka Aldabergenova 12, 14-mınýttarda esepti ústemeleı tústi.
Ekinshi kezeńde quramalar eki-ekiden shaıba soqty. Qazaqstan quramasynan Anna Pıatkova 34, Karına Felzınk 38-mınýtta mergendik tanytsa, oǵan qarsylastar eki shaıbamen jaýap qaıyrdy.

Úshinshi kezeńde el quramasynan Pernesh Áshimova 51 Aleksandra Şegaı 52-mınýtta gol soqty.
Osylaısha Qazaqstan quramasy qarsylasynan 9:2 esebimen basym túsip, qatarynan tórtinshi márte jeńiske jetti.

Eske salsaq, budan buryn el quramasy Meksıkany 4:2, Taıvandy 3:0, Islandııany 7:2 esebimen tize búktirdi. 

Endi qazaqstandyq hokkeıshiler 13 sáýirde Ispanııamen quramasymen kezdesedi. 
Atalǵan topta jeńimpaz atanǵan qurama aldaǵy jyly birinshi dıvızıonǵa joldama alady.