Álem chempıonaty: Qazaqstan hokkeı quramasy Shvetsııadan jeńilip qaldy

<p>ASTANA. KAZINFORM - Shaıbaly hokkeıden 2024 jylǵy álem chempıonatynda Qazaqstan quramasy tórtinshi oıynyn Shvetsııaǵa qarsy ótkizdi.</p>

Shvetsııalyq hokkeıshiler álemde úzdikter qatarynda sanalady. Qazirge deıin atalǵan qurama 11 márte chempıon atandy. Sondaı-aq, birneshe márte kúmis jáne qola júldeger boldy. Dese de sońǵy márte 2018 jyly jeńis tuǵyryna kóterildi.

Bıyl alǵashqy týrdan keıin birde-bir márte upaı joǵaltpaǵan qurama týrnır kestesinde kósh bastap tur. Al qazaqstandyq hokkeıshiler nebári úsh upaımen jetinshi orynǵa ornalasqan.

Búgingi kezdesý barysynda shvetsııalyq hokkeıshiler oıyn tizginin qolda ustaýǵa tyrysty. Nátıjesinde olardyń qatarynan Markýs ıÝhansson 10, Lınýs ıÝhansson 35, Fabıan Zetterlýnd 41-mınýtta úsh shaıba soǵyp ketti.

Oǵan qazaqstandyq Ádil Beketaev 45-mınýtta bir shaıbamen jaýap qaıyrdy.

Osylaısha Qazaqstan quramasy qarsylasyna 1:3 esebimen ese jiberdi.

Álem chempıonatynda qazaqstandyq hokkeıshiler V tobynda Frantsııa, Slovakııa, Latvııa, Shvetsııa, Germanııa, AQSh jáne Polshamen synǵa túsýde.

Dúbirli doda 10-26 mamyr aralyǵynda Chehııanyń Praga jáne Ostrava qalalarynda ótedi.

Aıta ketsek, budan buryn qazaqstandyq hokkeıshiler Frantsııany 3:1 esebimen jeńse, odan keıin Slovakııaǵa 2:6, Latvııaǵa 0:2 esebimen ese jiberdi.

Endi el quramasy 17 mamyrda Germanııa, 19 mamyrda AQSh, 20 mamyrda Polsha hokkeıshilerimen sheberlik baıqasady.