Álem chempıonaty: Qazaqstan fýtzal quramasy Ispanııamen teń tústi

<p>ASTANA. KAZINFORM - Búgin, 15 qyrkúıekte fýtzaldan Qazaqstan quramasy Ózbekstanda ótip jatqan álem chempıonatynda alǵashqy oıynynda Ispanııamen kezdesti.&nbsp;</p>

El quramasy D tobynda Ispanııa, Lıvııa jáne Jańa Zelandııamen sheberlik baıqasady. Kezdesý barysynda qazaqstandyq Birjan Orazov nebári besinshi sekýndta qarsylastar qaqpasynan sańylaý taýyp ketti.

Ispanııalyq qurama tarazy basyn teńestirýge umtyldy. Oıynnyń 17-mınýtynda Hesýs Gordılo komandasyn jeńilisten qutqaryp qaldy. Osylaısha quramalar 1:1 esebine qanaǵat bildirdi.

Eki qurama buǵan deıin tórt márte kezdesse, barlyǵynda ıspanııalyq fýtzalshylar jeńiske jetken edi. 

Endi Qazaqstan quramasy 18 qyrkúıekte Lıvııamen oınasa, Ispanııa Jańa Zelandııamen sheberlik baıqasady. Atalǵan synda el namysyn Narýn Serikov, Leonardo Igıta, Arnold Knaýb, Rınat Tóreǵazın, Aqjol Dáribaı, Ábdirasýl Ábdimanapuly, Azat Valıýllın, Leo, Albert Aqbalyqov, Shyńǵys Esenamanov, Birjan Orazov, Dáýren Tursaǵulov, Jahangır Rashıt jáne Dýglas Jýnıor syndy sportshylar qorǵaıdy. 

Aıta ketsek, búgin atalǵan topta Lıvııa quramasy Jańa Zelandııany 5:2 esebimen tize búktirdi.

Búgin S tobynda Aýǵanstan Angola 5:2 esebimen jeńse, endi Argentına men Ýkraına oınaıdy.

16 qyrkúıekte E tobynda Portýgalııa men Panama, Tájikstan men Marokko, F tobynda Iran men Venesýela, Gvatemala men Frantsııa sheberlik baıqasady.

Eske salaıyq, buǵan deıin álem chempıonatynyń toptyq kezeńi aıasynda Qazaqstan men Ispanııa quramalary kezdesetinin habarlaǵan edik.