Álem chempıonaty: Qazaqstan áıelder quramasy úshinshi márte jeńiske jetti

<p>ASTANA. KAZINFORM - Shaıbaly hokkeıden Qazaqstan qyzdar quramasy ekinshi dıvızıonnyń A tobynda úshinshi jeńisine qol jetkizdi.</p>

Atalǵan oıyndar 7 sáýirden bastap Andorra memleketinde ótip jatyr. Jarysty qazaqstandyq hokkeıshiler sátti ótkizip keledi. 

Búgingi oıynda olar Islandııa quramasymen kezdesti. Kezdesý barysynda jınaqy qımyldap, qarsylasyna kóp gol soǵýǵa tyrysty.

El quramasynan Ekaterına Kýtsenko nebári 1-mınýtta esep ashsa, odan keıin Dılnaz Saıahatqyzy 5, Mýnıra Saıahatqyzy 11-mınýtta gol soqty.

Al 14-mınýtta Aleksandra Şegaı mergendik tanytsa, 19-mınýtta Karına Felzınk kózdegen nysanadan múlt ketken joq.

Budan keıin Mýnıra Saıahatqyzy 23, Anastasııa Orazbaeva 33-mınýtta basymdyqty arttyrsa, oǵan ıslandııalyq hokkeıshiler nebári eki golmen jaýap qaıyrdy. 

Eske salsaq, budan buryn el quramasy Meksıkany 4:2, Taıvandy 3:0 esebimen tize búktirdi. 
Endi qazaqstandyq hokkeıshiler 11 sáýirde Belgııa quramasymen kezdesedi.

Qazaqstandyq hokkeıshiler byltyr Ońtústik Koreıanyń Sývon qalasynda birinshi dıvızıonnyń V tobynda synǵa tústi.

Barlyq oıynda jeńilip, bir satyǵa tómen dıvızıonǵa tómendedi.