Álem chempıonaty: grek-rım kúresinen eki qazaqstandyq balýan kúmis aldy

<p>ASTANA. KAZINFORM - Iordanııanyń Amman qalasynda ótip jatqan kúres túrlerinen 17 jasqa deıingi sportshylar arasyndaǵy álem birinshiliginde qazaqstandyq balýandar eki kúmis medal aldy.</p>

Grek-rım kúresinen Alpamys Bolatuly (51 keli) fınalda amerıkalyq Djeıden Reınıden 5:7 esebimen jeńilip, kúmis medal ıelendi.

Sondaı-aq Erkebulan Anapııa (80 keli) fınalda neıtraldy sportshy Mıhaıl Shkarınge 0:3 esebimen jol berip, ekinshi orynǵa jaıǵasty.

Al 48 kelide qola medalǵa talasqan Edige Tóleýtaev 1:3 esebimen ázerbaıjandyq Amrah Amrahovtan jeńilip, júldeden tys qaldy.

Atalǵan dodada qazaqstandyq balýandar tolyq quramda synǵa túsedi. Atap aıtsaq, grek-rım, erkin jáne áıelder kúresinen jalpy 30 balýan el namysyn qorǵamaq.

Eske salsaq, ótken jyly atalǵan álem birinshiligi 31 shilde men 6 tamyz aralyǵynda Ystanbul qalasynda ótken bolatyn. Onda otandastarymyz 1 kúmis, 2 qola júldege qol jetkizdi.