Álem chempıonaty: Búgin aýyr atlet Aqmolda Saıramkez saıysqa túsedi

<p>ASTANA. KAZINFORM - Bahreınniń Manama qalasynda jalaýyn kótergen aýyr atletıkadan álem chempıonatynda el quramasynan alǵashqy bolyp Aqmolda Saıramkez (67 keli) saıysqa túsedi.</p>

Qazirge deıin 22-jastaǵy atlet kóptegen jarysta jeńimpaz atanyp úlgerdi. 2019 jyly jasóspirimder arasynda álem chempıony bolsa, Azııa chempıonatynda 2019 jyly jasóspirimder jáne 2020 jyly jastar arasynda qola júldege qol sozdy.

Sondaı-aq ol 2021 jylǵy jastar aarsyndaǵy álem chempıonatynda jáne 2024 jyly eresekter arasyndaǵy Azııa chempıonatynda kúmis aldy.

Elimizdiń erler quramasynyń bas bapkeri Dáýren Bekmuhanbetovtiń aıtýynsha, Aqmolda Saıramkez A tobynda synǵa túsedi. Bul salmaqta barlyǵy 27 sportshy júldelerdi sarapqa salady. Basty qarsylastary – Qytaı, Soltústik Koreıa jáne Túrkııadan kelgen aýyr atletter.

Álem chempıonatynan tikeleı kórsetilimdi Qazsport telearnasynan 21:30-de tamashalaýǵa bolady.

Jarysta erler quramasynda Aqmoldadan ózge Aleksandr Ývarov (81 keli), Alekseı Chýrkın (81 keli), Denıs Ýlanov (89 keli), Denıs Polýboıarınov (89 keli), Kırııl Staroverkın (96 keli, Nurǵısa Ádiletuly (96 keli, Artem Antropov (102 keli), Andas Samarqanov (109 keli) pen Meıram Sultan (109 keli) saıysqa túsedi.

Al áıelder quramasynda Karına Gorıcheva (64 keli), Araı Nurlybekova (71 keli), Aıanat Jumaǵalı (76 keli), Aısha Omarova (76 keli) jáne Lıýbov Kovalchýk (+87 keli) júldelerdi sarapqa salady.