«Álem barysynyń» ¼ fınalynda kezdesetin balýandar anyqtaldy

ASTANA. QazAqparat - Almatyda ótip jatqan «Álem barysy» chempıonatynda 1/4 fınalǵa shyqqan barlyq 8 balýannyń esimderi belgili boldy, dep habarlaıdy QazAqparat tilshisi.

1/8 fınaldyq kezeńde birinshi bolyp boz kilemge shyqqan Reseı jáne Ázerbaıjan balýandarynyń teketiresinde reseılik Roman Bobıkov qarsylasyn sanaýly sekýndtyń ishinde alyp urdy. Sonymen birge polıak balýany Petr Talach ganalyq Ýelbek Arıany utsa, budan keıin beldesýge shyqqan úshinshi jup - Latvııa balýany Igors Kostıns pen tájik Dadahan Kýrbonalıevtiń kúresi sońǵy balýannyń jeńisimen aıaqtaldy.

Kópshilik kútken kezdesýlerdiń biri ırandyq balýan Jafar Pahlevanıjaghargh pen qazaq balýany Ersultan Muzafarovtyń kúresi edi. Shyn myqtylardyń teketiresi kezinde qazaq balýany ózinen alpys keli artyq ırandyqtan aılasyn asyrdy.

Budan soń Mýhsın Hısomıddınov (Ózbekstan) pen armıan balýany Akob Arakelıannyń kúresi armıan balýanynyń jeńilisimen aıaqtaldy. Aıbek Nuǵymarov bolsa lıtvalyq balýandy taza jeńse, chehııalyq Lýkash Glavachek pen Gýram Týshıshvılıdiń (Grýzııa) beldesýinde grýzııalyqtyń aıy ońynan týdy.

1/8 fınaldyq kezeńniń eń sońǵy kezdesýinde Tanel Karro (Estonııa) men Aıbat Seıten shyǵyp, tartysty beldesýde qazaq balýany jeńis týyn jelbiretti.

Qazaqstan atynan synǵa túsip jatqan bes balýannyń ekeýi - Rýslan Ábdirazaqov pen Nurdáýlet Jarylǵapov jarys jolynan shyǵyp qaldy.

Eske salaıyq, osy ýaqytta Almatydaǵy Balýan Sholaq atyndaǵy sport saraıynda «Álem barysy» absolıýttik álem chempıonaty ótip jatyr.