«Álem Barysynda» qazaqtyń namysyn qoldan bermeımiz - Aıbek Nuǵymarov

ASTANA. QazAqparat - «Álem Barysy» beldesýinde qazaqtyń namysyn qoldan bermeımiz. Bul týraly búgin Astanada ótetin «Álem Barysy» chempıonatyna arnalǵan Ortalyq kommýnıkatsııalar qyzmetindegi baspasóz máslıhatynda qazaq kúresinen tórt dúrkin álem chempıony jáne «Qazaqstan Barysynyń» jeńimpazy Aıbek Nuǵymarov aıtty, dep habarlaıdy QazAqparat.

«Sportshy, «Álem Barysyna» qatysýshy retinde qazaqtyń namysyn qorǵaıtyn bolamyn. Ázirshe alty palýan dep otyr. Onyń ishinde bıylǵy jyly Qazaqstan Barysy bolǵan Elaman baýyrymyz,  qaraǵandylyq Erjan Shynkeev aǵamyz, Muhıt Tursynov, Dáýren Nuralınov, Seıten Aıbatov jáne men barmyn. Namysty qoldan bermek emespiz. 2014 jyly ózderińiz biletindeı, «Álem Barysy» Pavlodar qalasynda ótken edi. Aqtyq beldesýde kýbalyqqa ese jibergen edik.  Endi esemizdi jibermeımiz, 8 qyrkúıek kúni bolatyn beldesýde qazaqtyń namysyn qoldan bermeımiz», - dedi Aıbek Nuǵymarov. 

Esterińizge sala ketsek, 2014 jyly Pavlodarda ótken «Álem Barysynan» birinshi chempıonatqa 35 eldiń apaıtós balýandary qatysqan bolatyn. Tartysty báseke nátıjesinde altyn belbeý men 100 myń AQSh dollardy kýbalyq Braıson ıelendi. Ekinshi oryn Aıbek Nuǵymarovqa, úshinshi oryn reseılik Maksım Shırıaevqa buıyrǵan edi.

Aıta keteıik, 6 qyrkúıek kúni saǵat 18:00-de «Mega Silk Way» oıyn-saýyq ortalyǵynda "Alem Barysy" qatysýshylarynyń saltanatty salmaq ólsheý jáne jerebe tartý rásimi ótedi. Absolıýtti álem chempıonatyn tikeleı efırde «Qazaqstan», «Qazsport», túriktiń «TRT Avaz», Reseıdiń «Match! Planeta» jáne «Boks TV» telearnalary kórsetedi.