Álem barysy: Fınalda Aıbek Nuǵymarov pen Ersultan Muzafarov beldesetin boldy

ASTANA. QazAqparat - Álem barysy-2018 chempıoatynda fınaldyq beldesýge Aıbek Nuǵymarov pen Ersultan Muzafarov shyqty, dep habarlaıdy QazAqparat tilshisi.

Jartylaı fınalda kezdesken Reseı balýany Roman Bobıkov pen qazaqstandyq Ersultan Muzafarovtyń kezdesýi kóptiń esinde qalary sózsiz. Ózinen áldeqaıda alyp deneli orys balýanyn otandasymyz alǵashqy sekýndtarda-aq birshama sastyrǵany anyq. Kóptiń qoldaýynan kúsh alǵan Ersultan tórt márte ádis qoldanyp, Bobıkovty jartylaı fınalda súrindirdi.

Budan keıin Aıbek Nuǵymarov pen gúrji balýany Gýram Týshıshvılı kezdesti. Alǵashqy eki búk upaımen alǵa shyqqan Týshıshvılı byltyrǵy esesin bıyl qaıtarmaqqa baryn saldy. Alaıda 3 mınýt 35 sekýndta Aıbek ony taza jeńip, fınalǵa shyqty.

Eske sala ketsek, byltyr elordada ótken «Álem barysynda» dál osy eki qarsylas fınalda kezdesip, Aıbek «Álem barysy» atanǵan bolatyn.

Aıta ketsek, buǵan deıin «Álem barysynyń» jartylaı fınalyna Aıbek Nuǵymarov, Ersultan Muzafarov (Qazaqstan), Roman Bobıkov (Reseı) pen Gýram Týshıshvılı (Grýzııa) shyqqanyn habarlaǵan bolatynbyz.

Qazaqstan atynan synǵa túsip jatqan bes balýannyń ekeýi - Rýslan Ábdirazaqov pen Nurdáýlet Jarylǵapov alǵashqy aınalymda jarys jolynan shyǵyp qalǵan bolatyn.  

Chempıonat Almatydaǵy Balýan Sholaq atyndaǵy sport saraıynda ótip jatyr.