Álem barysy: Aıbek Nuǵymarov pen Elaman Erǵalıev kelesi kezeńge ótti

ASTANA. QazAqparat - Elordanyń «Barys Arenasynda» qazaq kúresinen «Álem barysynyń» saltanatty ashylýy bolyp ótti. Saltanatty sharanyń izin ala qazaq balýany Dáýren Nuralınov ózbekstandyq Mýhsın Hısomıddınovpen boz kilemge shyqty, dep habarlaıdy «QazAqparat» HAA tilshisi.

«Álem barysynyń» saltanatty ashylýynda QR Energetıka mınıstri, Halyqaralyq qazaq kúresi federatsııasynyń prezıdenti Qanat Bozymbaev jáne QR Parlament Senatynyń depýtaty Darhan Káletaev balýandarǵa sáttilik tiledi.

Aıta keterligi, Qanat Bozymbaev Pavlodar oblysynyń ákimi bolyp turǵan tusynda qazaq kúresinen tuńǵysh "Álem Barysy" ótken bolatyn. Federatsııa prezıdenti qazaq kúresiniń jyl sanap damyp kele jatqanyn tilge tıek etti.

Saltanatty jıynǵa kelgen QR Mádenıet jáne sport mınıstri Arystanbek Muhamedıuly «Álem barysy» dodasyn ashyq dep jarııalady.

Saltanatty ashylýdan keıin birden kúres bastalyp ketti. Ókinishke oraı, alǵashqy kezdesýinde Dáýren Nuralınov ózbek balýanynan utylyp qaldy. Al Polshadan kelgen Petor Tomash Talochpen ótken dodada Aıbek Nuǵymarov jeńiske jetti. Budan keıin boz kilemge shyqqan Ońtústik Koreıanyń Bıen Gva Lı esimdi balýanyn alǵashqy sekýndtarda-aq jambasqa salyp, taza jeńdi.

Eske sala ketsek, Astana qalasyndaǵy «Barys Arenada» búgin «Álem barysy» dodasy ótip jatyr. Osyǵan deıin boz kilemge shyqqan Erjan Shynkeev qarsylasyn taza jeńip, kelesi aınalymǵa joldama alǵan bolatyn..