«Álem barysy» atanǵan Aıbek Nuǵymarov týraly ne bilemiz

  ASTANA. QazAQparat - Qazaqstanda qazaq kúresinen tuńǵysh ret tórt dúrkin álem chempıony atanǵan jalǵyz balýan bar. Mine, búgin sol balýanymyz taǵy bir tarıhı jeńisine qol jetkizip, qazaq balýandary arasynan tuńǵysh «Álem barysy» ataǵyn jeńip aldy, dep habarlaıdy QazAqparat tilshisi.

Ol - Shyǵys Qazaqstan oblysynyń týmasy, qazaqtyń qaısar balýan uly Aıbek Nuǵymarov. Negizi, Aıbekti oqyrman qaýymǵa qaıta tanystyrýdyń ózi artyq bolar. Dese de, el namysyn eń bıik belesterden kórsetip júrgen asyl azamattarymyz týraly qansha jazsaq ta kóptik etpeıtini belgili.

Sol úshin búgin balýanymyz týraly, taǵy bir toqtalyp, oqyrmandarymyzǵa onyń sporttaǵy qol jetkizgen tabystaryn qaıta bir esterine salýdy jón sanadyq.

Áýeli Aıbektiń sporttaǵy jetistikteri men ómirbaıanyna qysqasha toqtalyp óteıik.

Aıbek Nuǵymarov 1987 jyly 3 maýsymda Shyǵys Qazaqstan oblysy, Abaı aýdanyna qarasty Qundyzdy degen shaǵyn aýylda dúnıege kelgen. Qazaq kúresinen álemdi tórt ret baǵyndyrǵan (2010, 2013, 2014, 2016) jalǵyz balýan. Úsh dúrkin (2008, 2009, 2014) Azııa chempıony.

Onyń laqap aty - Shyǵys barysy. Boıy - 188 sm. Salmaǵy - 140 kg.  Sporttyq ataǵy - Qazaq kúresinen QR eńbek sińirgen sport sheberi.  Sporttyq jetistikteri - tórt dúrkin álem chempıony (2010, 2013, 2014, 2016), «Álem Barysy» halyqaralyq týrnıriniń kúmis júldegeri (2014), «Qazaqstan Barysy» týrnıriniń jeńimpazy (2013) jáne eki dúrkin qola júldegeri (2012, 2017), eki dúrkin Álem Kýbogynyń ıegeri (2011, 2017), QR chempıonatynyń birneshe dúrkin jeńimpazy, «Eýrazııa Barysy» halyqaralyq týrnıriniń jeńimpazy (2015, 2016)

2011, 2012, 2013, 2014, 2015, 2016, 2017 jyldary «Qazaqstan Barysy» týrnırine qatysty. Bapkeri - Serik Qorjykenov.

Shyǵystyń shymyr balýanynyń osyndaı aýyz toltyryp aıtarlyqtaı jetistikteri jeterlik. Búgingi qol jetkizgen tarıhı jeńisi kezdeısoqtyq emes ekeni osydan-aq anyq kórinip tur.